Lajçak takohet me Daçiq, flasin për dialogun

Emisari special i BE-së për dialogun Kosovë – Serbi, Miroslav Lajçak, ka pritur në Bruksel ministrin e Jashtëm serb, Ivica Daçiq.

Lajçak tha se me Daçiq folën për çështjen e dialogut dhe normalizimin e marrëdhënieve në mes Kosovës e Serbisë.

“Mirëprita sot në Bruksel ministrin e Jashtëm serb, Ivica Daçiq. Kemi shkëmbyer mendime rreth dialogut për normalizimin e marrëdhënieve në kuadër të aspiratave të Bashkimit Evropian të Serbisë, ka thënë Lajçak, shkruan Reporteri.net.

Javën e kaluar, emisari special i BE-së bashkë me katër diplomatë të tjerë qëndruan në Kosovë e Serbi, ku u takuan me liderët e të dyja vendeve.

Temë kyçe e diskutimeve ishte çështja e dialogut në mes Kosovës e Serbisë, por edhe plani franko-gjerman.