Kryetari i Lidhjes Demokratike të Ksoovës, Isa Mustafa, është deklaruar pas votimit të propozimin për shkarkimin e Vjosa Osmanit nga pozitat e saj drejtuese në këtë parti.

Ai përmes një njoftimi në faqen zyrtare të LDK-së në rrjetin social Facebook, ka bërë të ditur se për propozimin për lirimin e Osmanit nga pozita e nënkryetares dhe nga kryesia e LDK-së, janë përgjigjur 95 nga 123 anëtarët aktual të Këshillit të Përgjithshëm të LDK-së, ku 92 prej tyre janë votuar Pro shkarkimit të Osmanit, 3 kanë dalë kundër, ndërsa 4 kanë abstenuar dhe 28 nuk kanë marrë pjesë në votim, shkruan Reporteri.net.

Pozitën e Osmanit, e zuri Avdullah Hoti, i cili mori 92 vota pro, 3 kundër dhe 4 abstenime.

Kjo është deklarata e plotë e Mustafës:

Të nderuar anëtarë të Këshillit të Përgjithshëm të LDK-së

Ju falënderoj për shprehjen e qëndrimit tuaj në letrën që ua përcolla sot më dt. 20 qershor 2020.

Kam nderin tu njoftoj se deri në përfundim të afatit të shprehjes së qëndrimit tuaj, më 20 qershor 2020 në ora 19:00, pyetjeve: A e përkrahni propozimin që z. Avdullah Hoti të jetë nënkryetar i LDK-së, nga 123 anëtarë aktual të Këshillit të Përgjithshëm të LDK-së janë përgjigjur 99 anëtarë, prej tyre 92 janë shprehur për (Po); 3 janë shprehur kundër (Jo), 4 kanë abstenuar dhe 24 nuk janë përgjigjur, s’kanë marrë pjesë në votim.

Ndërsa për sa i përket propozimit për lirimin e znj. Vjosa Osmani nga pozita e nënkryetares dhe nga Kryesia e LDK-së, nga 123 anëtarë aktual të Këshillit të Përgjithshëm të LDK-së janë përgjigjur 95 anëtarë, prej tyre 70 janë shprehur për (Po); 16 janë shprehur kundër (Jo), 9 kanë abstenuar dhe 28 nuk janë përgjigjur, s’kanë marrë pjesë në votim.

Në bazë të kësaj, si Kryetar i LDK-së konstatoj se Këshilli i Përgjithshëm i Lidhjes Demokratike të Kosovës VENDOSI që:

1. Avdullah Hoti të zgjedhet nënkryetar i LDK-së;

znj. Vjosa Osmani të lirohet nga pozita e nënkryetares së LDK-së dhe anëtares së Kryesisë.

Me respekt,

Kryetari i LDK-së

Isa Mustafa /Reporteri.net/