Zhbllokimi i dialogut mes Kosovës e Serbisë, heqja ose pezullimi i taksës një qind për qind ndaj produkteve serbe e boshnjake, si dhe çështja e liberalizimit të vizave për kosovarët pritet të jenë disa nga temat të cilat do të diskutohen në takimin e kryeministrit të Kosovës Ramush Haradinaj me kancelaren gjermane Angela Merkel, i cili do të mbahet më 6 qershor të këtij viti.

Zyrtarë nga zyra e kryeministrit Ramush Haradinaj kanë thënë se kryeministri në këtë takim do ta kërkojë mbështetjen e Gjermanisë në procesin e liberalizimit të vizave, si dhe për dialogun mes Kosovës e Serbisë.

“Kryeministri Haradinaj në fillim të qershorit do të udhëtojë për në Berlin në një vizitë dyditore. Me ftesë të kreut të Bundestagut gjerman do të marrë pjesë në ‘Lutjet e mëngjesit’, që organizohen atje. Pastaj do të ketë takime me deputetë të Bundestagut, si dhe më 6 qershor do të zhvillojë një takim pune me kancelaren Merkel. Tashmë dihet se kërkesat e kryeministrit Haradinaj janë mbështetja e Gjermanisë në procesin e liberalizimit të vizave, për dialogun dhe për fuqizimin e marrëdhënieve bilaterale”, thuhet në përgjigjen e tyre për Zërin.

Ndërkaq, nuk është bërë e ditur nëse kanë marrë ndonjë mesazh lidhur me taksën që Kosova i ka vendosur Serbisë tash e sa muaj, e që u bë pengesë për dialogun në mes të dyja vendeve.

Sidoqoftë, cështja e liberalizimit të vizave tani nuk po përmendet vetëm nga kosovarët. Një gjë të tillë e kanë zënë në gojë edhe ministrat gjerman, i Jashtëm dhe ai i Brendshëm, duke i thënë PO Kosovës për vizat.

Ndryshe, procesi i liberalizimit të vizave për kosovarët ka stagnuar që nga dhjetori i vitit të shkuar, ku Këshilli i Ministrave hodhi poshtë cështjen e Kosovës. Dhe, krejt kjo, është raportuar se po  ndodhë për shkak të procesit zgjedhor që do të mbajë BE-ja këtë muaj./Reporteri.net