Kreu i PDK-së, Memli Krasniqi, ka kujtuar sulmet terroriste të 11 shtatorit, duke thënë se ky akt terrorist nuk e goditi veç SHBA-në, por mbarë popujt e shtetet që besojnë në vlera të demokracisë, lirisë e qytetërimit. 

Krasniqi thotë se kjo ditë që ndryshoi jetën e Amerikës por edhe mbarë botës, do të mbahet mend përgjithmonë, si ditë kur terrori fiku mijëra jetë të pafajshme, për t’i ngjallur miliarda jetë tjera kundër tij, deri në fitore.

Postimi i tij:

20 vjet më parë, Shtetet e Bashkuara të Amerikës, u goditën nga sulmet terroriste më brutale në historinë e njerëzimit, të cilat lanë mijëra viktima civile e të pafajshme, si dhe qindra zjarrfikës e shërbyes publik që u përpoqën deri në çastet e fundit të jetës për shpëtimin e tyre.

Ky akt terrorist nuk goditi vetëm SHBA-të, por mbarë popujt e shtetet që besojnë në vlera të demokracisë, lirisë e qytetërimit. Ngjashëm, siç edhe ndërgjegjësoi mbarë botën demokratike për urrejtjen dhe mizorinë e terrorizmit, ndaj të cilit, kundërvënia nuk qe më alternativë, por domosdoshmëri.

Në 20 vjetorin e kësaj ngjarjeje tragjike për kombin dhe shtetin amerikan, kujtojmë me nderim të gjithë qytetarët që humbën jetën nga këto sulme. Viktimat ishin të 70 kombësive të ndryshme dhe në mesin e tyre kishte edhe 4 bashkëkombas shqiptarë, çka dëshmon se terrorizmi është kërcënim global për të gjithë popujt pa dallim.

Kjo ditë që ndryshoi jetën e Amerikës por edhe mbarë botës, do të mbahet mend përgjithmonë, si ditë kur terrori fiku mijëra jetë të pafajshme, për t’i ngjallur miliarda jetë tjera kundër tij, deri në fitore.

Ngjashëm siç SHBA-të që ishin pranë nesh në ditët tona më të vështira, populli ynë e ndau këtë dhimbje me popullin amerikan.

Jemi krenarë që Kosova është rreshtuar në koalicionin ndërkombëtar kundër terrorizmit të drejtuar nga SHBA-të. Partia Demokratike e Kosovës do të punojë si gjithmonë fuqishëm që lidhja jonë me SHBA-të dhe popullin amerikan të forcohet edhe më tutje, që së bashku të punojmë për përhapjen e demokracisë dhe forcimin e sigurisë e paqes në botë.