Ish kryeministri i Kosovës, Albin Kurti iu është drejtuar me një video të fundit qytetarëve nga zyra e Kryeministrisë. 

Kurti, nga aty ka numëruar sukseset e qeverisjes së tij, duke përmendur ndër të tjera zvogëlimin e kabinetit qeveritar, zvogëlimin e pagave, reciprocitetin me Serbinë e shkarkimet nga bordet, shkruan Reporteri.

“Katër muaj qeverisje, kurse nesër nuk do të jem më në atë zyrë. Katër muaj qeverisje e mirë, me 213 vendime që e kanë bërë shumë më të mirë politikën në Kosovë. Që nga zgjedhjet e 6 tetorit kemi dëshmuar se jemi  partia e parë në vend e Kuvend, kemi dëshmuar se është e mundur të qeverisësh pa marrëveshje me Listën Serbe, se mund të zvogëlohet kabineti qeveritar, se mund të zvogëlohen pagat e qeveritarëve e të rritet përkushtimi ndaj qytetarëve. Dëshmuam se mund të ndalet gjakderdhja financiare, se mund të menaxhohet pandemia pa gjendje të jashtëzakonshme, kemi dëshmuar se mund të vendoset reciprociteti me Serbinë.”, u shpreh ndër të tjera Kurti.

Qeverinë e re në krye me Avdullah Hotin e ka quajtur qeveri koti derisa ka thënë se nesër nuk do të marrë pjesë në ceremoninë e dorëzimit të detyrës.

“Aktgjykimi i fundit i Kushtetueses është i papranueshëm. Me atë vendim ata kanë bërë agresion mbi Kushtetutën dhe kanë zhvleftësuar veten. Kjo qeveri është e paligjshme, kjo është qeveria Koti, ne jemi qeveri alternative”, u shrpeh ndër të tjera Kurti në mesazhin e tij të fundit. /Reporteri.net