Dita e parë e festës së Kurban Bajramit është nesër. Manifestimi qendror për territorin e Kosovës kushtuar kësaj feste mbahet në Xhaminë e Madhe në Prishtinë. Namazi i Kurban Bajramit falet në ora 06:15.

Manifestimi fillon në ora 4:55, me faljen e namazit të sabahut, pas të cilit do të jetë ligjërata tematike kushtuar kësaj feste, të cilën do ta mbaj Dr. Sadat Islami, ligjërues në Fakultetin e Studimeve Islame në Prishtinë, shkruan reporteri.net

Namazi i Kurban Bajramit falet në ora 06:15 të cilit do t’i prijë Jakup ef. Çunaku, drejtor i Medresesë “Alaudin” në Prishtinë, ndërsa hytben apo mesazhin e Kurban Bajramit do ta mbajë zëvendëskryetari i kryesisë së Bashkësisë Islame të Kosovës, Reshat ef. Mexhidi.

Me rastin e festës së Kurban – Bajramit, si tradicionalisht, BIK organizon pritje përurimi në selinë e kryesisë.

Sot zëvendëskryetari i Kryesisë së Bashkësisë Islame të Kosovës, Reshat Mexhiti, uroi të gjithë besimtarët duke bërë thirrje që të jenë më solidarë me njëri-tjetrin.

Ai tha se njerëzimi duhet të kultivojë vlera për një jetë më të mirë, për një shoqëri të shëndoshë dhe për një unitet dhe vëllazëri të mirëfilltë. Mixhiti theksoi se festa e Kurban Bajramit reflekton mënyrën më të mirë për mësimet hyjnore për barazi, drejtësi, unitet, solidaritet, mirësi e sakrificë./Reporteri.net