Prokuroria Speciale e Kosovës ka ngritur aktakuzë në mungesë në Gjykatën Themelore në Prishtinë ndaj 35 të pandehurve për krime lufte në lagjen e Jasharëve në Prekaz.

Prokurori Valdet Gashi, ka thënë se bazuar në provat materiale dhe personale kanë arritur t’i identifikojnë 35 të pandehur, të cilët ka thënë se u përkasin pozitave të larta komanduese të strukturave të njësive speciale të policisë serbe.

Kreu i njësisë për operacione speciale, Milorad Ulemek “Legija” është një prej të dyshuarve të identifikuar për sulmin ndaj familjes Jashari.

Prokurori Special, Valdet Gashi, ka thënë se ka qenë kërkesë special e tij që të sulmohej shtëpia e Jasharajve.

“Janë persona që kanë menaxhuar në struktura të caktuara. Pjesa me ë rëndësishme dhe sfida ka qenë identifikimi i njësive”, ka deklaruar Gashi.

Ai ka treguar edhe kush ka qenë i përfshirë në sulm.

“Departamenti i Sigurisë publike ka qenë i inkuadruar në këtë aksion. Ministria e Brendshme, sigurimi shtetëror, dhe në kuadër të sigurimit shtetëror ka qenë edhe njësia për operacione speciale e Serbisë. Këtë s’deshta ta them, por po e bëj  të ditur se këtë njësi e ka udhëhequr, Milorad Ulemek  – Legija. Ka pasur për detyrë dhe më kërkesë të tij speciale që të sulmohet shtëpia e Shaban Jasharit. Kështu edhe ka ndodhur në terren”, ka thënë Gashi.