Ministri i Tregtisë dhe Industrisë, Vesel Krasniqi, në mbledhjen Qeverisë, ka njoftuar se pas rekomandimit të Ministrisë së Shëndetësisë, është përpiluar një udhëzues se si do të funksionojnë sektori i gastronomisë dhe pishinat.

Ai tha se në bazë të rekomandimeve, do mbahet edhe një takim me grupin punues në kuadër të MSH-së dhe ashtu siç janë dakorduar, nga data 1 korrik 2020 duke iu përmbajtur udhëzimeve të cilat MTI do t’i japë, gastronomia dhe pishinat do të fillojnë punën, shkruan Reporteri.net.

Qeveria e Kosovës në mbledhjen e mbajtur sonte po ashtu ka marrë vendim që Aeroporti i Prishtinës të hapet më 28 qershor.

Përveç këtij vendimi që konsiderohet si i një rëndësie jetike për ekonominë kosovare, qeveria ka shfuqizuar edhe disa vendime të mëhershme të marra në kuadër të masave për parandalimin e koronavirusit, ndër to edhe vendimi me të cilin ndalohen aktivitetet publike dhe jo publike që kanë mundur të mbahen pa praninë publikut, tubimet sportive, konferenca, tryeza të rrumbullakëta etj. /Reporteri.net/