Kryetari i Partisë Socialdemokrate, Dardan Molliqaj, e ka ftuar kryetarin e Lëvizjes Vetëvendosje, Albin Kurti, që të shkojë në Hagë për të dëshmuar kundër UÇK-së , pasi që sipas tij tanimë ai është pozicionuar në anën e atyre që ftohen si dëshmitarë.

Molliqaj thotë se tash e një kohë të gjatë, Albin Kurti dhe Vetëvendosje kanë thënë që Thaçi po negocion një marrëveshje të dëmshme për Kosovën për ta shpëtuar veten nga Specialja.
Sipas kreut të PSD-së, një qëndrim i tillë presupozon e Thaçi është fajtor dhe se ka bërë krime, prandaj po synon t’i ikë gjykimit, shkruan Reporteri.net.

Përmes një statusi në faqen e tij zyrtare në rrjetin social, Facebook, Molliqaj ka thënë se është kuptuar që Kurti nuk sheh asgjë përtej interesit të tij politik.

“Dikur thoshe se pushteti i VV-së nuk do t’i dorëzojë njerëzit e UÇK-së. Për ta realizuar këtë interes, sot je në anën e atyre që akuzojnë UÇK-në. Në anën e atyre që e shohin me përçmim luftën për liri. Je vendosur në anën e atyre që luftën e UÇK-së e shohin si një shpërthim agresiv e të dëmshëm të disa katundarëve.”, ka shkruar ai.

Molliqaj i thotë Kurtit që të tregojë se gjykimet politike bëhen të pranueshme vetëm atëherë kur t’i eliminojnë kundërshtarët politik.

“Shko dhe trego që drejtësia edhe mund të jetë selektive përderisa të shërben ty. Shko Albin se kompleksi yt me historinë atje shërohet. Atje po e rishkruajnë historinë.

Tregoju në Hagë se historia duhet të ndryshohet, sidomos aty ku ti nuk je protagonist. Trego se ajo duhet të rishkruhet, sidomos në pjesët ku emri yt nuk përmendet.”, ka thënë tutje në statusin e tij Molliqaj.

Ky është postimi i tij i plotë:

Shko Albin…

VV ka kohë që thotë se Hashim Thaçi po e negocion një marrëveshje të dëmshme për Kosovën, për ta shpëtuar kështu veten nga Gjykata. Në këtë qëndrim, presupozimi është i qartë. Sipas Kurtit, drejtori politik i UÇK-së, Hashim Thaçi qenka i fajshëm, pra paska bërë krime lufte dhe prandaj po ikën prej gjykimit.

Albin, tashmë e kemi kuptuar që nuk sheh asgjë tjetër përtej interesit tënd politik. Dikur thoshe se pushteti i VV-së nuk do t’i dorëzojë njerëzit e UÇK-së. Për ta realizuar këtë interes, sot je në anën e atyre që akuzojnë UÇK-në. Në anën e atyre që e shohin me përçmim luftën për liri. Je vendosur në anën e atyre që luftën e UÇK-së e shohin si një shpërthim agresiv e të dëmshëm të disa katundarëve.

Albin, çfarë di ti për krimet e UÇK-së kur iu drejtove Hashim Thaçit me sugjerimin për të shkuar në Hagë? A din edhe për ndonjë tjetër, apo veç për drejtuesin politik? Siç duket, tash për tash ky po ta zë rrugën.

Shko Albin thuaj të gjitha, sepse edhe ashtu, me qëndrimet e tua, e ke vendosur veten në anën e atyre që duhet të ftohen si dëshmitarë. Merri me vete edhe kolegët e tjerë të partisë: Shkelzenin, Fatmiren, Liburnin, Hakiun etj. sepse në bazë të qëndrimeve të tyre, edhe ata duket se dijnë shumë.

Shko Albin, dhe trego që gjykimet politike bëhen të pranueshme vetëm atëherë kur t’i eliminojnë kundërshtarët politik. Shko dhe trego që drejtësia edhe mund të jetë selektive përderisa të shërben ty.

Shko Albin se kompleksi yt me historinë atje shërohet. Atje po e rishkruajnë historinë.

Tregoju në Hagë se historia duhet të ndryshohet, sidomos aty ku ti nuk je protagonist. Trego se ajo duhet të rishkruhet, sidomos në pjesët ku emri yt nuk përmendet.

https://www.facebook.com/dardanmolliqaj2/posts/3312943198727558?__xts__%5B0%5D=68.ARC85Pl3-DjunfVuiYjmKEvivRkExdmAdSjKXIcwB1C50SIioRn8s8wIN6Zitpig2uWz3jM4C6-lF-PsO3_LEZmUjhT3IoW2s5iKVQyk_lBmzZ7geIsm-Mn0eSwz54OBMOa0ddtaGk1yfwVWsmQi5nFojdRLftBr0qjnmzvaMNxaAuxfzep1sWX1y_8xNR0VQ1qB-6TdID25HFQEsza04qamSiUXiucV_abj5gpIzFvJyvbC8K1qN9iv6LKpldBo3rIf6eBmRvqGiDy0y6GiRy-0o8fq1NZvV7uI5OiQJo3xkSOrqv5MwBkZMSEhG0jM7OkC_V8_S-6hxvZ0Y2WrTX4n&__tn__=-R

/Reporteri.net/