Kryetari i Partisë Socialdemokrate, Daradan Molliqaj në përvjetorin e vdekjes së aktivistit të Vetëvendosjes, Astri Dehari ka thënë se kjo parti nuk e do zbardhjen e rastit. 

Molliqaj ka shkruar se VV nuk e do zbardhjen e rastit Dehari, për shkak se sipas tij rasti i zbardhur është i papërdorshëm.

Ai ka thënë se mundësitë e fundit për zbardhjen e rastit i ka asgjësuar vetë pushteti i Kurtit.

“Sot është përvjetori i vdekjes së Astrit Deharit, shokut tonë të mirë e bashkaktivistit të përkushtuar. Astriti ishte veprimtar i mirë e njeri me virtyte. Ai ka ndërruar jetë në burg. Është e tepërt të thuhet se kjo ngjarje duhet zbardhur me çdo kusht. Por, tragjedia takon absurdin kur e din se mundesitë e fundit për zbardhjen e rastit i asgjësoi vetë pushteti i Kurtit. Zbardhjen e rastit nuk e do vetë VV, rasti i zbardhur është rast i pa përdorshëm.”, ka shkruar ai.

Molliqaj është shprehur se emri Astrit Dehari do të mbetet epitafi i shkallës në të cilën mbërrin dehumanizimi kur lufta për pushtet instrumentalizon gjithçka.

“Jemi shumë krenarë që ne kurrë nuk e kaluam atë limit. As brenda VV-se, as jashtë saj. Kurrë nuk e shpallëm të vrarë, as të vetëvrarë. Rasti Dehari tregon çfarë lloj raporti ka ky lloj regjimi me të vërtetën. Saktësia, objektiviteti e shkenca kanë vlerë vetëm kur janë të përdorshme.”, ka shkruar ai.