Derisa pritet ndërrimi i pushteteve si rezultat i vullnetit qytetar të shprehur në zgjedhjet e tetorit, nuk kanë ndaluar punësimet familjare dhe partiake nga qeveria aktuale e cila është në përfundimit të mandatit.

Punësime të tilla kanë ndodhur së fundmi në Ministrisë e Punëve të Brendshme të drejtuar nga ministri Ekrem Mustafa i AKR-së.

Gazeta Alo ka mësuar se muajin e kaluar, gjegjësisht në prag të fushatës parazgjedhore në Ministrinë e Punëve të Brendshme janë punësuar tre persona në pozita të ndryshme.

Të punësuarit janë Elsa Bruqi në pozitën asistentes administrative në QPD Prishtinë, Tushe Shala si asistente administrative në Qendrën për Pajisje në Dokumente në Pejë si dhe Arbnorë Koliqi-Gashi e punësuar si asistente administrative ne Qendrën e Regjistrimit të Automjeteve në Prishtinë.

Po ashtu Gazeta Alo ka marrë vesh se këta tre zyrtarë të punësuar kanë lidhje familjare në Ministri.

Mbi të gjitha kemi arritur të vërtetojmë lidhjet familjare të këtyre personave të punësuar. Elsa Bruqi ka të punësuar motrën e saj si shefe personeli në MPB, Vjollca Bruqi.

Tushe Shala ka të punësuar motrën e saj Bule Shala si zyrtare e personelit, ndërsa Arbnorë Koliqi-Gashi është reja e Sokol Gashit, shef i Logjistikës në MPB.

Gazeta Alo ka dërguar pyetje MPB-së për të kuptuar se në çfarë baze ligjore janë punësuar të lartcekurit, por kjo ministri nuk ka kthyer përgjigje.