Ministri i Bujqësisë nga radhët e LDK-së, Besian Mustafa tha se 30 vitet e fundit i kanë sulmuar e linçuar fizikisht e verbalisht, si individ e si parti.

Mustafa tha se asnjëherë nuk ua kanë kthyer këto sulme, por i kanë afruar të gjithë kosovarët të punojnë për Kosovën.

Sipas tij, kjo është madhështia e LDK-së, transmeton Indeksonline.

Duhet përmendur faktin se këto reagime vijnë pasi koalicioni LDK-VV pati përplasje gjatë ditëve të fundit, pas vendimit të marrë nga kryeministri i vendit, Albin Kurti për shkarkimin e ministrit të Brendshëm dhe Administratës Publike, Agim Veliu.

Postimi i plotë i Mustafës:

Këto 30 vite, na kanë sulmuar e linçuar fizikisht e verbalisht, si individ e si parti. Asnjëherë nuk ua kemi kthyer këto sulme por i kemi afruar të gjithë kosovarët të punojmë për Kosovën e gjatë rrugës kemi ndërtuar, për herë të parë në historinë e Kosovës, miqësi me Amerikën e Evropën.

Kjo është madhështia e LDK-së. Gjithmonë kemi ndërtuar e përkrahur institucionet demokratike, mbi të gjitha lirinë e fjalës, edhe atëherë kur janë përdorë e keqpërdorë për të na sulmuar. Këto veçori na kanë bërë kala të pamposhtur; të tillë do mbesim. LDK, dhe vetëm LDK, deri në ditën e fundit!