Kryetari i LDK-së Isa Mustafa ka njoftuar se gjatë këtyre ditëve është takuar me të gjithë ambasadorët e QUNT-it.

Sipas tij, ambasadoret e SHBA-së, Britanisë së Madhe, Francës, Gjermanisë dhe Italisë në Kosovë, kanë shprehur vlerësim ndaj përpjekjeve të tij dhe Albin Kurtit për arritjen e një marrëveshje politike për bashkëqeverisjeje .

“Nuk ka pasur kërkesa eksplicite”, tha Mustafa para gazetarëve në një konferencë për media, pasi takojë anëtarët e këshillit Drejtues të LDK-së, shkruan Reporteri.net.

“Personalisht jam takuar më të gjithë ambasadorët e QUINT’it”, konfirmoi ai, derisa mohoi se është takuar vetëm me ambasadorin amerikan Philip Kosnett.

Tutje, Mustafa tha se takimi i radhës me Kurtin do të ndodhë pasi të marrë ftesë nga ky i fundit.

“Do të vazhdojmë t’i përgjigjemi ftesës së VV-së për takimet e ardhshme”, tha Mustafa.

“LDK mbetet e përkushtuar që të vazhdojmë edhe më tutje që të bëhen të gjitha përpjekjet që të arrihet një marrëveshje”, shtoj kryetari i LDK-së, derisa tha se Këshilli Drejtues i partisë së tij mbetet i vendosur se “LDK duhet në marrëveshje të vlerësohet karshi përkrahjes që ka marrë në zgjedhje, qoftë në ndarjen e përgjithësive me VV-në, qoftë për programin qeverisës të harmonizuar”.

Isa Mustafa, po ashtu, konfirmoi se nesër do të ketë takim me të dërguarit e Angela Merkelit në Prishtinë. /Reporteri.net/.