Analisti Armend Muja sot ka aderuar në Lëvizjen Vetëvendosje, shkruan Reporteri.net.

Aderimi i tij u bë publik nga vet kryetari i VV-së, Albin Kurti, shkruan Reporteri.net.

Në pritjen për Mujën përveç figurave qendrore të kësaj Lëvizjeje ka marrë pjesë edhe familja e tij.

Në fotografitë e publikuara në Facebook, nga Kurti shihet edhe gruaja dhe djali i Armend Mujës.

Ky është postimi i Kurtit me rastin e aderimit të Mujës:

Me Armendin njihemi qëmoti, por nga sot, do të jemi edhe aktivistë e kolegë në VETËVENDOSJE!.

Me disa anëtarë të Kryesisë dhe ish deputetë, i uruam mirëseardhje Armend Mujës, e më pas zhvilluam një diskutim rreth zgjedhjeve parlamentare të 14 shkurtit dhe qeverisjes sonë të ardhshme. Ai tani është drejtor i Kolegjit Riinvest dhe ligjërues i ekonomisë politike ndërkombëtare. Armendi ka kryer studimet në London School of Economics dhe Corvinus University. Në Master dhe Doktoratë ka punuar në ekonominë politike të Evropës Jug-Lindore.

Më herët ka shërbyer si drejtor për çështje akademike në Kolegjin UBT. Gjithashtu ai ka punuar si këshilltar në projektet e Programit për Reforma Ekonomike (ERP), Planin e Zhvillimit Kombëtar dhe Vlerësim të Planit Strategjik Arsimor për GIZ, UNDP dhe Këshillin e Evropës. Armend Muja është me prejardhje nga Mitrovica dhe mezi presim të punojmë bashkë në Lëvizje.