Nis “lufta e ftohtë” e Kurtit me Ramën, zbulohen emrat e kandidatëve të VV-së për zgjedhjet në Shqipëri

Albin Kurtit për herë të parë edhe zyrtarisht pritet ta sfidojë Edi Ramën dhe partitë tjera në Shqipëri.


Kësisoj, partia fituese e zgjedhjeve në Kosovë synon që të fitojë ulëse edhe në Parlamentin e shtetit amë.

LVV-ja ka vendosur që në zgjedhjet e 25 prillit të garojë me 3 kandidatë, njëri prej tyre emër i njohur në opinion publik në Kosovë.

Bëhet fjalë për Boiken Abazi si dhe Iliaz Shehu e Kreshnik Merxhanin.

Kjo është konfirmuar edhe nga Selia Qendrore e LVV-së në Kosovë. Zyrtari për media në këtë parti, Arlind Manxhuka, ka konfirmuar për “Indeksonline” garën për zgjedhje.

“Po, këta janë. Boiken Abazi tashmë i ka mbledhur nënshkrimet. Ndërsa, për Shehun dhe Merxhanin ende janë në proces”, është shprehur shkurt ai.

Ndryshe, sot është regjistruar koalicioni i parë i quajtur “Shqipëria Fiton”. Partia për Drejtësi Integrim dhe Unitet, Partia Agrare Ambientaliste, Partia Republikane, Lëvizja për Zhvillim Kombëtar dhe Demokristianët do te jene pjese e listës së Partisë Demokratike.

Ndërkohë, mediat në Tiranë raportojnë se PD-ja dhe LSI-ja kanë parë si mënyrë të maksimalizimit të mirë të votës së qytetarëve daljen me dy lista në këto zgjedhje.

Partia e Lulëzim Bashës dhe Monika Kryemadhit do të udhëheqin koalicionin “Shqipëria Fiton”.