Në Selinë Qendrore të Lëvizjes Vetëvendosje ka filluar mbledhja e kryesisë së kësaj partie, e cila është vazhdim i mbledhjes së djeshme që u ndërpre në gjysmë për shkak të takimit Kurti-Mustafa.

Në mbledhjen e sotme do të diskutohet dërgimi i mandatarit për formimin e Qeverisë te Presidenti Hashim Thaçi, shkruan Reporteri.net.

Kujtojmë se afati kohor prej 48 orësh që presidenti i vendit, Hashim Thaçi, i ofroi kryetarit të Lëvizjes Vetëvendosje, Albin Kurtit, për të nominuar kanddiatin për kryeministër skadon pasditen e sotme.

Ndërkaq, në orët e pasdites kreu i VV-së, Albin Kurti do të zhvillojë një takim tjetër me kreun e LDK-së, Isa Mustafa, në përpjekjet për të arritur një marrëveshje për koalicionin qeverisës.

Kujtojmë se Kurti dhe Mustafa, u takuan dje pas sa ditëve ‘idhnim’ mes vete. Takimi zgjati 3 orë dhe ata nuk u prononcuan për media.

Takimi Kurti-Mustafa u zhvillua pas përfundimit të mbledhjes së Kryesisë së Lëvizjes Vetëvendosje, ku u diskutua për propozimin e kandidatit për kryeministër të ardhshëm të Qeverisë së Republikës së Kosovës, që pritet t’i dërgohet presidentit Thaçi./Reporteri.net