Nënkryetarja e LDK-së, Vjosa Osmani, një ditë para mbajtjes së seancës konstituive i ka bërë apel zyrtarëve të partisë së saj dhe VV-së që interesin shtetëror ta vendosin para atij personal.

Osmani, thotë se kushdo që luan me verdiktin e qytetarëve të shprehur me 6 tetor, është duke luajtur me fatin e Kosovës.

“Interesi shtetëror duhet të jetë mbi atë individual. Pavarësisht sfidave që i kemi në këto momente, duhet të gjithë të ja kujtojmë vetës se nuk ka asgjë me të shenjtë se vullneti qytetar. Dhe ky vullnet është përcaktuar qartë për koalicionin LDK-LVV. Kushdo që luan me këtë verdikt të qytetarëve, është duke luajtur me fatin e Kosovës”, ka thënë Osmani për Gazeta Blic.

Për të diskutuar rreth koalicionit qeverisës, sot Vetëvendosje mbledh grupin paralmentar nga ora 14:00.

Kujtojmë se nesër është caktuar seanca konstituive, e cila do të fillojë në ora 15:00 dhe deri në këtë kohë pritet të shihet nëse do të arrihet marrëveshje mes VV-së dhe LDK-së, apo këto parti do të shkojnë të përçarë.