Gjykata Themelore në Prishtinë ka aprovuar kërkesën e Prokurorisë për caktimin e masës së paraburgimit ndaj Gj.L., e cila dyshohet se ka kryer veprën penale ‘Vrasja e foshnjës gjatë lindjes’, raporton Gazeta Online Reporteri.net.
Përmes një komunikate për media, Gjykata njofton se caktimin e masës së paraburgimit e arsyeton fakti se nëse e dyshuara gjendet në liri, ekzistojnë rrethana që tregojnë rrezikun se do të pengoj rrjedhën e procedurës penale, duke ndikuar tek dëshmitarët në këtë procedurë penale.
“Gjyqtari i procedurës paraprake ka aprovuar si të bazuar kërkesën e Prokurorisë Themelore në Prishtinë, për caktimin e masës së paraburgimit kundër të pandehures GJ.L dhe të njëjtës i është caktuar masa e paraburgimit në kohëzgjatje prej një (1) muaji.
Gjykata vlerësoj se caktimin e masës së paraburgimit e arsyeton fakti se nëse e pandehura gjendet në liri, ekzistojnë rrethana që tregojnë rrezikun se do të pengoj rrjedhën e procedures penale, duke ndikuar tek dëshmitarët në këtë procedurë penale”, thuhet në njoftim.
Zëdhënësja e Prokurorisë Themelore në Prishtinë, Laureta Ulaj, i tha Gazetës Reporteri se e arrestuara e dytë, e cila është nëna e të dyshuarës së parë, do të hetohet në procedurë të rregullt për veprën penale ‘Ndihmë në vrasjen e foshnjës gjatë lindjes’.
“E dyshuara tjetër po hetohet në procedurë të rregullt. Ndalesa prej 48 orësh ka përfunduar”, tha Ulaj për Reporteri.net.