Policia e Kosovës ka njoftuar se pasditen e sotme, një qytetar ka dorëzuar në stacion një shumë të parave të cilat i kishte gjetur në fshatin Shupkovc të Mitrovicës.

Përmes një njoftimi në faqen zyrtare, Policia ka kërkuar pronarin, shkruan Reporteri.net.

“Në orët e pasdites së sotme, në Stacionin Policor Jugu në Mitrovicë, një qytetar ka dorëzuar një shumë të parave të cilat i kishte gjetur në fshatin Shupkovc të Mitrovicës. Me qëllim identifikimin e pronarit të shumës së parave të gjetura, Policia e Kosovës fton personin që i ka humbur këto para të paraqitet në Stacionin Policor Jugu në Mitrovicë, ose të kontaktojë në numrin 192. Policia falënderon qytetarin për përgjegjshmërinë dhe bashkëpunimin e treguar”, thuhet në njoftim.