×
  • Lajme
  • Lajme

    Nuk përfillet vendimi i qeverisë, xhamitë e kishat nuk ndalojnë aktivitetet

    Reporteri
    12 Mars 2020 | 13:31

    Përkundër vendimit të Qeverisë së Kosovës që aktivitetet publike dhe jo publike mund të zhvillohen të mbyllura pa praninë e publikut, institucionet fetare deri më tani nuk kanë anuluar kryerjen e riteve të tyre.


    Bashkësia Islame e Kosovës dhe Kisha Katolike në Kosovë nuk kanë marrë vendim për t’i anuluar kryerjen e riteve fetare në xhami e kisha, ku marrin pjesë numër i madh i besimtarëve.

    Myftiu i Kosovës, Naim Tërnava, i pyetur përmes telefonit se a do të ndalojnë kryerjen e riteve në xhamia si masë parandaluese për përhapjen e koronavirusit, ka sugjeruar që t’i referohemi komunikatës së lëshuar ditën e djeshme.

    Në këtë komunikatë u kërkohet imamëve që ligjërata e hytbes së xhumasë të mbahet në maksimum 10 minuta dhe jo të anulohet, megjithëse lihet e hapur mundësia për një vendim tjetër.

    “Mbështesim të gjitha masat e marra nga Qeveria e Kosovës për mbrojtjen nga koronavirusi. BIK-u me kujdes do ta përcjellë situatën dhe me kohë do të marrë vendimet e duhura në institucionet tona fetaro-arsimore. Kërkojmë nga imamët tanë që ligjërata e hytbes së xhumasë ta mbajnë sa më shkurtë, maksimumi 10 minuta, dhe t’i kushtohet vetëm masave të mbrojtjes nga kjo sfidë me të cilën po përballet njerëzimi”, thuhet në komunikatë.

    As Kisha Katolike në Kosovë nuk ka marrë vendim për t’i anuluar meshat.

    Zëdhënësi i Ipeshkvisë Fatmir Koliqi, në një përgjigje me shkrim thotë se tash për tash meshat nuk do të anulohen.

    “Tash për tash mesha nuk anulohet. Në te ardhmen do te sillemi sipas rrethanave te reja”, tha ai.

    Kisha Katolike u ka bërë thirrje të gjithë besimtarëve që të veprojnë sipas udhëzimeve të institucioneve shëndetësore të Kosovës.

    Përkundër që deri më tash në Kosovë nuk ka asnjë rast me koronavirus, Qeveria e Kosovës ka marrë një sërë masash parandaluese në funksion të mbrojtjes ndaj këtij virusi. Janë 11 masa parandaluese të cilat janë votuar nga Qeveria, ku ndër to është edhe ndërprerja e procesit mësimor deri më datën 27 mars.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!