Albin Kurti ka dy ditë që nuk është takuar me kreun e LDK-së, Isa Mustafa, që nga e enjtja kur të dy pas një takimi dy orësh lëshuan objektin e Kuvendit për të mos thënë asnjë fjalë të vetme para gazetarëve.

Ndërkohë që ka spekulime se Kurti dhe Mustafa mund të kenë takime të fshehta, kreu i VV-së gjatë ditës së sotme ka bërë homazhe te varrezat e dëshmorëve në Gjilan me rastin e përvjetorit të vrasjes së dy dëshmorëve të kombit, Rexhep Mala dhe Nuhi Berisha, shkruan Reporteri.net.

“Një delegacion i Lëvizjes Vetëvendosje i prirë nga kryetari Albin Kurti ka bërë sot homazhe te varrezat e dëshmorëve në Gjilan me rastin e përvjetorit të vrasjes së dy dëshmorëve të kombit, Rexhep Mala dhe Nuhi Berisha”, thuhet në njoftimin e VV-së.

Po ashtu, Kurti së bashku me deputetë të Kuvendit dhe zyrtarë e aktivistë të qendrës së VV-së në Gjilan kanë bërë vizitë edhe te familjet Mala e Berisha.

Kujtojmë se gjatë kësaj jave, VV dhe LDK kanë vazhduar bisedimet intensive, mirëpo pa arritur në gjuhë të përbashkët për bashkëqeverisje.

https://www.facebook.com/media/set/?set=a.10156457198562000&type=3