Ndihmës Sekretari për Çështjet Evropiane dhe Euroaziatike në Departamentin e Shtetit amerikan, James O’Brien ka mbjellë një pemë në kujtim të diplomates amerikane, Tina Kaidanow, ambasadores së parë të SHBA-së në Kosovën shtet, e cila vdiq ditë më parë.

Pema u mboll në oborrin e Ambasadës Amerikane në Prishtinë, njoftoi ambasadori Hovenier.

“Kjo pemë do të qëndrojë si një simbol i trashëgimisë së saj, duke na kujtuar përkushtimin e saj të palëkundur në rrugëtimin e Kosovës drejt paqes, demokracisë dhe pavarësisë.”, ka njoftuar ambasadori amerikan Jeffrey Hovenier përmes një postimi në Facebook.

O’Brien po qëndron sot në Kosovë, ku është duke u takuar me kryeministrin Albin Kurti. Nuk janë paralajmëruar takime me liderë të tjerë. /Reporteri.net/