Ambasadori i BE-së në Kosovë, Aivo Orav, tha se për masat ndëshkuese të BE-së ndaj Kosovës nuk ka “një përgjigje përfundimtare”.

Ai përmendi rekomandimin e ish-Përfaqësuesit të Lartë të BE-së, Josep Borrell, për heqjen e tyre dhe tha se diskutimet brenda Këshillit Evropian vazhdojnë.

“Kam frikë se nuk mund t’i jap një përgjigje përfundimtare kësaj pyetjeje. Siç e dini, ish-Përfaqësuesi i Lartë i rekomandoi Këshillit në qershor 2024 heqjen e masave. Më pas, në dhjetor 2024, Këshilli në konkluzionet e tij për zgjerimin deklaroi se BE-ja gradualisht do t’i heqë masat paralelisht me hapat e mëtejshëm të Kosovës për të de-përshkallëzuar tensionet në veri. Diskutimet brenda Këshillit vazhdojnë dhe vendimi nëse masat do të hiqen përfundimisht i takon 27 vendeve anëtare të BE-së, pasi një vendim i tillë kërkon konsensus”, tha ai për Kosovo Online.

Orav tha se Përfaqësuesja e re e Lartë për Politikë të Jashtme dhe Siguri, Kaja Kallas, dëshiron që Kosova të përparojë në rrugën e saj drejt BE-së.

“Kusht thelbësor për rrugën drejt BE-së si për Kosovën ashtu edhe për Serbinë është normalizimi i marrëdhënieve dhe zbatimi i zotimeve të dialogut”, përsëriti ai thirrjet e Unionit për Kosovën e Serbinë.

Në fillim të muajit Komisioni për Punë të Jashtme i Parlamentit Evropian ka miratuar  draft-raportin për progresin e Kosovës drejt BE-së gjatë viteve 2023-2024.

Eurodeputetët e Komisionit për Punë të Jashtme kanë bërë thirrje për heqjen e menjëhershme të masave të BE-së ndaj Kosovës, të cilat kanë thënë ata nuk justifikohen më pasi Kosova ka përmbushur kërkesat e BE-së.

Eurodeputetët nënvizuan se masat janë në kundërshtim të madh me përkushtimin e Kosovës ndaj vlerave evropiane dhe po pengojnë rifillimin e dialogut Beograd-Prishtinë në mirëbesim. /Reporteri.net/