Presidentja Vjosa Osmani është pritur me nderime ushtarake nga homologu i saj në Hungari, presidenti Sulyok.

Ajo ka falënderuar për këtë pritje, duke e cilësuar vizitën si të rëndësishme për avancimin e marrëdhënieve ndërmjet Kosovës dhe Hungarisë.

“Faleminderit për pritjen me nderime ushtarake në Budapest, President Sulyok! Një vizitë e rëndësishme për avancimin e marrëdhënieve ndërmjet Kosovës dhe Hungarisë, në dobi të qytetarëve tanë dhe në funksion të bashkëpunimit të ndërsjellë”, ka shkruar Osmani në Facebook.

Në njoftimin e lëshuar nga Zyra e Presidentes gjatë ditës, është thënë se pas këtij takimi do të zhvillohet një tjetër ndërmjet delegacioneve respektive të dy shteteve.

“Në kuadër të vizitës, Presidenti Sulyok do të shtrojë drekë zyrtare për Presidenten Osmani dhe delegacionin e saj në pallatin presidencial Sándor. Presidentja Osmani, gjatë vizitës në Hungari, do të pritet gjithashtu nga László Kövér, kryetar i Parlamentit të Hungarisë”, thuhet tutje në njoftim.