Presidentja Vjosa Osmani është takuar për herë të parë me Presidentin e Sirisë së lirë, Ahmed al Sharaa, në kuadër të Forumit Diplomatik të Antalisë, ku po merr pjesë me ftesë të Presidentit Recep Tayip Erdogan.

Osmani ka thënë se ky ishte takimi i tyre i parë për ta hapur kapituj të ri bashkëpunimi ndërmjet dy vendeve, teks ka shtuar se Kosova është e gatshme ta ndajë përvojën e saj në ndërtimin e institucioneve demokratike, shkruan Reporteri.net.

“Populli i Kosovës dhe populli i Sirisë kanë përjetuar vuajtje të panumërta nga regjime diktatoriale e gjenocidale, në luftën e tyre për të qenë të lirë. Sot, me Presidentin e Sirisë së lirë, z. Ahmed al Sharaa, kishim takimin tonë të parë për ta hapur kapituj të ri bashkëpunimi ndërmjet dy vendeve tona. Kosova dhe Siria ndajnë plagë të njëjta: dhimbjen e luftës, shpërnguljen, e sfidat e rindërtimit, ndaj Kosova është e gatshme ta ndajë përvojën e saj në ndërtimin e institucioneve demokratike”, ka shkruar Osmani.