Koalicioni fitues i zgjedhjeve PAN pritet që të mblidhet së shpejti për t’u konsultuar për emrin e ri të mandatarit për kryeministër të Qeverisë së Kosovës, pas kërkesës së Presidentit Hashim Thaçi, për një propozim të ri.

Kështu ka bërë të ditur numri dy i PDK-së Xhavit Haliti. Ai tha se kryetari i koalicionit PAN, Kadri Veseli do të takohet me krerët e partive në koalicion për t’u marrë vesh lidhur me mandatarin e ri.

“Z. Thaçi ka vepruar në bazë të Kushtetutës me këtë letër drejtuar z. Veseli si kryetar i koalicionit PAN. Tani pritet që koalicioni PAN të mblidhet dhe të dalë me propozim për kandidatin e ri për kryeministër. Pastaj varët nga Kuvendi nëse ia jep besimin apo jo“, tha ai, raporton GazetaBlic.

I pyetur, për mundësitë e shkuarjes në zgjedhje të parakohshme, në rast se nuk arrihet marrëveshje për një mandatar të ri, Haliti tha se aktualisht si parti janë duke i bërë përgatitjet për këtë çështje.

“Partitë politike në përgjithësi janë deklaruar se duan zgjedhje, por sa janë të përgatitura secila e di për partinë e vet. Ne si PDK po i bëjmë të gjitha përgatitjet për zgjedhje të reja”, ka thënë ai.

Proceduralisht, pas caktimit të mandatarit për formimin e qeverisë, pas propozimit të partisë politike ose të koalicionit që përbën shumicën e Kuvendit, kandidati i ri për kryeministër jo më vonë se pesëmbëdhjetë ditë pas emërimit, paraqet përbërjen e qeverisë së re para Kuvendit të Kosovës dhe kërkon miratimin nga ana e Kuvendit.

Nëse ajo përbërje e propozuar e Qeverisë nuk merr shumicën e votave të nevojshme, presidenti brenda dhjetë ditësh emëron kandidatin tjetër sipas së njëjtës procedurë. Nëse as herën e dytë nuk zgjidhet qeveria, atëherë presidenti i shpall zgjedhjet që duhet të mbahen jo më vonë se 40 ditë nga dita e shpalljes së tyre.