Pas mbledhjes së Kryesisë së Kuvendit, Partia Demokratike e Kosovës ka vendosur që të dërgojë në Gjykatën Kushtetuese projektligjin për KPM-në.

Këtë e bëri të ditur në konferencë, Shefi i grupit parlamentar të PDK-së, Abelard Tahiri. Ai konsideroi që ky projektligj ka për qëllim kontrollin e mediave të pavarura.

Përpos PDK-së edhe LDK-ja pritet që këtë projektligj të dërgojë në Kushtetuese.

Deputeti i LDK-së, Armend Zemaj, ka thënë se nëse ky projektligj nuk ndryshon, atëherë do ta dërgojnë në Gjykatën Kushtetuese.

Tahiri gjithashtu theksojë se të enjten do të mbahet seanca e radhës së Kuvendit.

Asociacioni i Gazetarëve të Kosovës, Këshilli i Mediave të Shkruara të Kosovës, por edhe një grup i organizatave ndërkombëtare i patën bërë thirrje Qeverisë së Kosovës që të heqë dorë nga ndryshimet në këtë ligj.

Edhe Zyra e Bashkimit Evropian në Kosovë ka thënë se ndryshimet në Projektligjin për KPM-në duhet të bëhen në atë mënyrë që nuk do të kenë “ndikim negativ” në lirinë e mediave.

Aktualisht, tekstet e publikuara në mediat online monitorohen nga Këshilli i Mediave të Shkruara të Kosovës. Ai nuk gjobit mediat për gabimet e tyre, por merr vendime për ankesat e bëra ndaj mediave dhe më pas vendimet e Këshillit mund të përdoren për të ngritur padi civile ndaj mediave nëpër gjykatat e Kosovës./Reporteri.net/.