Deputetja e PDK-së, Vlora Çitaku pas dështimit të tentativës së nëntëmbëdhjetë për konstituimin e Kuvendit të Kosovës, ka thënë se kreu i VV-së, Albin Kurti duhet të reflektojë dhe të ndërrojë kandidatin për kryeparlamentar në mënyrë që të ecet tutje me konstituimin e Kuvendit.

“Nga këtu, meqenëse po e kemi të pamundur të flasim nga foltorja e Kuvendit, i bëjmë thirrje Kurtit të reflektojë dhe të zhbllokojë situatën në mënyrë që institucionet e Kosovës të konstituohen sa më parë. PDK ka qenë shumë e përgjegjshme dhe konstruktive gjatë kësaj periudhe dhe do të përpiqemi të bëjmë çdo gjë për zhbllokimin e Kuvendit”, tha Çitaku para gazetarëve.

Çitaku foli edhe për deklaratën e mbrëmshme të Kurtit, i cili tha se PDK duhet që edhe së paku një mandat të jetë në opozitë.

“Dëshirë” të Kurtit e quajti deputetja e PDK-së këtë deklaratë, teksa tha shkurt se qytetarët kanë folur dhe realiteti është ndryshe.

“Nuk ka shumicë parlamentare. I bëjmë ftesë të reflektojë, të ndërrojë kandidatin dhe të ecim tutje. Nuk i komentoj dëshirat e deputetit Kurti. Realiteti është ndryshe, qytetarët kanë folur dhe është koha të ecim tutje”, tha Çitaku./Reporteri.net/

Kurti godet PDK’në: Duhet të jetë në opozitë minimalisht edhe një mandat, mezi e nxorëm pas 20 vjetësh