Deputeti i VV-së, Faton Peci pak para vazhdimit të seancës konstituive ka thënë për respektim të vullnetit të plotë të deputetëve të ketë votim të fshehtë në seancë, shkruan Reporteri.net.
Ai tha se Konjufca do të kandidojë sërish Haxhiun.
“Ne kemi hyrë në një cikël ku po kërkojmë që për shkak të respektimit të vullnetit të plotë të deputetëve të kemi një votim të fshehtë. Nëse e kemi shumicën e kërkuar vjen në shprehje se cili do të jetë emri. Unë besoj që Konjufca do të kandidojë zonja Haxhiun”, tha Peci.
/Reporteri.net/
Pas letrës së kryetarit të Lëvizjes Vetëvendosje, Albin Kurti, drejtuar Lidhjes Demokratike të Kosovës me ftesën për formimin e një koalicioni, ka reaguar deputetja e VV-së, Shqipe Selimi.
Në një postim në Facebook, ajo theksoi se tani është momenti që LDK të vendosë nëse do të vijojë me refuzim, apo do të tregojë gatishmëri për dialog dhe bashkëpunim.
“Tani është radha e LDK-së të përgjigjet me refuzim klasik apo me një qasje të re ndaj dialogut dhe bashkëpunimit!”, shkroi Selimi.
Pas dështimit të konstituimit të Kuvendit, Hekuran Murati ka vazhduar me akuzat ndaj partive tjera politike për bllokadën e krijuar, shkruan Reporteri.net.
I pyetur se a është e turpshme që akuzat vazhdimisht të hidhen në drejtim të opozitës për bashkëpunim me Listën Serbe, derisa i përmend bisedën e Kusari-Lilës me Radoiçiqin.
“Është e pasaktë”, përgjigjet Murati.
“A është e turpshme që akuzat të hidhen vazhdimisht të opozita, a keni fakte”. Atëherë faktet kanë qenë edhe për juve që keni bashkëpunuar me Listën Serbe për Ligjin për veteranët”, vazhdon pyetje e gazetarës.
Ndërsa Murati vazhdon të thotë se është e pavërtetë.
“Unë po ju pyes a janë të sakta. A është i saktë konstatimi që deputetët e opozitës në koordinim me deputetët e Listës Serbe nuk po marrin pjesë në votim dhe po e pamundësojnë konstituimin e Kuvendit”, ka thënë Murati duke tentuar vazhdimisht të ikë nga ajo çfarë po i thoshte gazetarja.
/Reporteri.net/
Kryetari i Lëvizjes Vetëvendosje, Albin Kurti i ka dërguar letër kryetarit të Lidhjes Demokratike të Kosovës, Lumir Abdixhiku ku i ka kërkuar koalicion.
“Po ju drejtohem me këtë letër meqë nuk u takuam ende. Deputetët e LDK-së, së fundmi kanë deklaruar publikisht se për të ecur përpara në legjislaturën e nëntë, fillimisht me konstituimin e Kuvendit, nevojitet marrëveshje politike. Si kryetar i Lëvizjes Vetëvendosje dhe kryeministër në detyrë i Republikës së Kosovës, jam i interesuar dhe i vullnetshëm për marrëveshje politike”, thuhet në letrën e Kurtit.
Kurti në letër përmend dallimet politike mes dy subjekteve, por sipas tij koalicionet bëhen pikërisht ndërmjet atyre që kanë dallime dhe i sugjeron kryetarit të LDK-së se mirë do të ishte të takohen e të flasin si “politikë të pjekur”.
Kurti ia ka përmendur LDK-së të gjitha koalicionet e pasluftës.
“LDK njihet si parti e cila nuk ka hezituar për koalicione qeverisëse: në 2001-2004 me PDK dhe AAK, në 2004-2007 me AAK, në 2008-2010 me PDK. Në 2014-2017 sërish me PDK, ndërkaq me LVV.”, thuhet në letër.
Kurti në letër thotë se mospajtimet e diferencat që mund të ketë LDK me LVV sot nuk janë më të mëdha sesa që LDK i ishte para koalicioneve të mëhershme kur i bëri ato.
Madje, Kurti në letër arsyetohet se prishja e koalicionit me LDK në vitin 2020 nuk ndodhi për shkak të mospajtimeve me Abdixhikun, por me “me disa të tjerë që nuk kanë më pozita të larta e as ndikim të madh në LDK si asokohe”, duke aluduar në Agim Veliun.
“Plus, në vitin 2020 ne bashkë kemi qenë kolegë në Kurti 1, kur unë nuk kam pasur probleme me juve, por me disa të tjerë që nuk kanë më pozita të larta e as ndikim të madh në LDK si asokohe.”, thuhet në letër.
Deputetët e Kuvendit të Kosovës kanë mbajtur një minutë heshtje në Kuvend për nder të dëshmorëve.
Por, deputetët e Listës Serbe nuk u ngritën në këmbë për të nderuar dëshmorët. Ata qëndruan ulur gjatë kësaj kohe.
Një minutë heshtje u mbajt në Kuvend për nder të dëshmorëve. Deputetët e Listës Serbe nuk u ngritën, por qëndruan ulur gjatë kësaj kohe.
5 Maji është një datë e rëndësishme historike për shqiptarët, ku përkujtohen Dëshmorët e Kombit.
Në këtë ditë, janë të shumtë emrat e të gjitha kohërave që kujtohen me mirënjohje jo vetëm për vlerat e përjetshme dhe kontributin që dhanë për çlirimin e vendit për një të ardhme më të mirë, por edhe të gjithë ata që sakrifikuan jetën e tyre për liri, demokraci, të drejtat e njeriut dhe dinjitetin e çdo shqiptari.
Kryetari i PDK-së, Memli Kransiqi ka thënë se Lëvizja Vetëvendosje në mungesë të shumicës parlamentare është duke vonuar këtë institucion, shkruan Reporteri.net.
Ai tha se për Kurtin më e rëndësishme po del të jetë Albulena Haxhiu se sa qytetarët që kanë votuar në zgjedhjet e 9 shkurtit.
Krasniqi theksoi se Haxhiu s’do të votohet nga partia që ai drejton në asnjë votim.
“Për Albin Kurtin duket se Haxhiu është më e rëndësishme se rreth një milion qytetarë. Në mungesë të besimit dhe votave, të shumicës për tu bërë kryeministër po luan me Albulena Haxhiun duke e mbajtur atë si kandidaten e cila nuk ka kaluar, nuk kaloj dhe s’do të kaloj në të ardhmen.
“Një gjë ta kuptoj ai, nuk mund ta mbajë peng me zor shtetin, e ka mbajtur mjaftueshëm gjatë tashmë. Nëse do të kemi rrugëdalje e ftoj ta ndryshoj kandidaten”, tha Krasniqi.
/Reporteri.net/
Deputetët e Kuvendit të Kosovës kanë dështuar edhe për të njëmbëdhjetën herë radhazi në përpjekje për konstituimin e legjislaturës së nëntë.
Seanca e nisur më 15 prill dështoi edhe sot për shkak të mospajtimeve politike për emrin e kryetarit të Kuvendit dhe po ashtu propozimin e ri të Vetëvendosjes për votim të fshehtë.
Në sallë ishin të pranishëm 111 deputetë.
Kryesuesi i Dehari u ka bërë thirrje partive që të propozojnë nga një anëtarë për komisionin për zgjedhjen e kryetarit të Kuvendit të Kosovës.
Pro krijimit të komisionit kanë votuar 56 deputetët e Lëvizjes Vetëvendosje.
Partitë e tjera nuk kanë marrë pjesë në votim.
Dehari e ka ndërprerë seancën dhe ka thënë se vazhdimi i radhës do të jetë më 7 maj.
Në fillim të seancës deputetët kanë nderuar me një minutë heshtje dëshmorët.
Pozicionet e partive politike mbesin të pandryshuara.
PDK, partia e dytë e dalë nga zgjedhjet dhe LDK, akuzojnë Vetëvendosjen për shkelje të rregullave e procedurave në mungesë numrash.
Në asnjërën nga përpjekjet e përsëritura, e propozuara e Lëvizjes Vetëvendosje, Albulena Haxhiu, nuk mori më shumë se 57 vota nga së paku 61 vota sa kërkohen.
Seanca konstituive e Kuvendit, e nisur më 15 prill, nuk është mbyllur as të hënën.
LVV-ja as sot nuk e ka propozuar direkt Haxhiun për kryeparlamentare, por nëpërmjet kryesuesit të seancës ka kërkuar që votimi për të të bëhet në mënyrë të fshehtë.
Partitë e tjera nuk e kanë pranuar këtë opsion, duke bërë që të mos i marrë votat e mjaftueshme Komisioni për mbikëqyrje të kësaj procedure.
E pas përmbylljes së seancës të së enjtes, propozimi i LVV-së për zgjedhjen e kryetarit të Kuvendit me votim të fshehtë është vlerësuar antikushtetues nga përfaqësues të partive që në legjislaturën e shkuar kanë qenë në opozitë. Ata, gjatë adresimeve nga holli i Kuvendit, e kanë quajtur arbitrare mënyrën se si kjo parti ka synuar që ta vërë në aplikim këtë formë votimi.
Zhbllokimit të situatës nuk i ka shërbyer as takimi konsultativ, i cili është mbajtur para seancës mes liderit të LVV-së, Kurti, dhe atij të PDK-së, Memli Krasniqi.
Në Lëvizjen Vetëvendosje (LVV) nuk kanë dhënë sinjale se do ta ndryshojnë emrin e kandidatit, përderisa në vazhdimin e nëntë të seancës të mërkurës, kjo parti ka propozuar ndryshimin e mënyrës së votimit – nga i hapur në të mbyllur.
Por ky propozim është kundërshtuar nga partitë që në legjislaturën e fundit kanë qenë në opozitë.
Takimet konsultative, përfshirë atë mes liderit të VV-së, Albin Kurti, dhe kreut të PDK-së, Memli Krasniqi, nuk kanë sjellë rezultate konkrete. VV nuk ka dhënë shenja për ndryshim kandidati, ndërsa ngërçi për konstituimin e Kuvendit mbetet i pazgjidhur./Reporteri.net/
Deputeti i Vetëvendosjes, Hekuran Murati edhe sot ka akuzuar opozitën për bllokimin e seancës konstituive të Kuvendit.
Ai tha se Albulena Haxhiu do të jetë sërish kandidate e VV-së për kryeparlamentare. Ndërsa tha se duhet të ndryshojë qëndrimi i opozitës për të bllokuar procesin e konstituimit të Kuvendit.
“Besoj që tashmë e dini propozimin e VV-së, që na takon si e drejtë kushtetuese. Është Albulena Haxhiu. Ajo çfarë duhet të ndryshojë është qëndrimi për të bllokuar i opozitës, që tashmë jemi dëshmitar disa vazhdime radhazi që vazhdojnë të votojnë kundër apo të mos marrin pjesë në votim. Ideja është që të ofrojmë dhe një mundësi tjetër votimi në pajtim dhe me frymën e kushtetutës dhe letrën e presidentes që kërkon , që të gjendet rrugëdalje për mundësi për zhbllokim. Ideja është që votimi i fshehtë do të ofronte mundësi më të mirë, për shprehjen demokratike të vullnetit të lirë të secilit deputet. Dhe mendojmë që kjo do të ishte zgjidhje. Prandaj pse të mos i jepet një shansë dhe kësaj mundësie që të shihet nëse kjo e zgjidh situatën”, tha ai.
Deputeti i LDK’së, Armend Zemaj, sot para nisjes së vazhdimit të seancës konstituive është pyetur nga gazetarët se pse s’po e votojnë ndërrimin e mënyrës së votimit.
Ai tha se ky është vendim i tyre.
“Nuk mund të ndërrohen rregullat në mes të lojës”, tha ai.
Ai shtoi se seanca konstitiuive ka nisur me votim të hapur dhe tash s’mund të ndërrohet.
Kryetari i Nismës, Fatmir Limaj lidhur me votimin e fshehtë të propozuar nga VV-ja, ai tha se ashtu si është nisur, ashtu edhe duhet të përfundojë, shkruan Reporteri.net.
Ani pse me ligj e rregullore ai tha është i përcaktuar, por që sipas Limajt ai ka nisur i hapur qysh në fillim.
“Ashtu si e kemi nisur, ashtu duhet përfunduar, me votim të hapur”, tha ai.
/Reporteri.net/
Deputetja e PDK-së, Ganimete Musliu, ka adresuar kritika në drejtim të kandidates për kryetare të Kuvendit, Albulena Haxhiu, duke thënë se është shembulli më i keq i politikanes, dhe sipas saj, edhe i gruas shqiptare.
Ajo tha se i vije keq që Albulena Haxhiu s’ka mësuar asgjë në politikë.
“Kurti po e përdor Haxhiun si me rastin e gazit lotsjellës. Albulena Haxhiu, po jep shembullin më të keq të politikanes dhe gruas shqiptare”.
“Vetëvendosje duke përdorur Haxhiun po punon në dëm të popullit”, tha Musliu. /Reporteri.net/.
Kryeministri në detyrë, Albin Kurti sërish ka zgjedhur të mos deklarohet para medieve, në kohën kur sot në Kuvend po mbahet seanca e njëmbëdhjetë konstituive, shkruan Reporteri.net.
Nga Vetëvendosje kanë deklaruar se emri i Albulena Haxhiut për ta mbetet i pandryshuar.
Të shtunën, sërish nuk kaloi komisioni për votimin e fshehtë.
/Reporteri.net/
Deputetja e zgjedhur e VV-së, Mimoza Kusari-Lila ka thënë se Albulena Haxhiun nuk e ndërrojnë për kandidate të postit të kryetares së Kuvendit.
Sa i përket votimit në mënyrë të fshehtë, Kusari-Lila dha sinjale se edhe sot do të propozohet një votim i tillë, ani pse iu dështoi dy herë.
Deputeti i Lëvizjes Vetëvendosje, Arbër Rexhaj, ka konfirmuar se Albulena Haxhiu do të jetë sërish kandidate për kryetare të Kuvendit.
Ai tha se do të shkojnë sërish me votim të fshehtë, dhe kjo sipas tij bëhet për të mundësuar ndonjë deputeti që të votojë fshehtë për zgjedhjen e kryeparlamentarit, shkruan Reporteri.net.
“Ndryshim nuk do të ketë, Albulena Haxhiu sërish do të jetë kandidate për kryetare të Kuvendit”
“Votimi i fshehtë nuk është shkelje procedurale. Shkojmë me votim të fshehtë, meqenëse janë këto numra që janë, dhe mund të ketë deputet që me vullnetin e vet ta zhbollokoj. Ndoshta në vullentin e tyre politik, mund të jetë ndonjë deputet që vendos ta zgjedh kryetarin e Kuvendit, dhe ta konstituojmë Kuvendin”, tha Rexhaj.
I pyetur se a do t’i thërras sërish Kurti për bisedime kryetarët e partive politike, Rexhaj tha se kjo i mbetet kryetarit të VV-së që të vendos.
“Kjo çështje është e kryetarit- kryeministrit Kurti që besoj se pati një iniciative të tillë duke i thirrur liderët të konsultohen e ku u përgjigj vetëm një subjekt politik”, tha ai. /Reporteri.net/.
Të shtunën për herën e dhjetë dështoi konstiuimi i kuvendit pasi VV kërkoi prapë votim të fshehtë për ta zgjedhur kryeparlamentarin.
Seanca do të vazhdojë sot nga ora 10:00.
PDK, LDK dhe AAK e kanë bërë të qartë se nuk do ta votojnë Albulena Haxhiun për kryetare të kuvendit, ndërsa VV ka thënë se nuk do e ndërrojnë kandidaten.
Pas votimit të kryekuvendarit është e përcaktuar të procedohet me votim të nënkryetarëve.
Votimi i kryeparlamentarit dhe nënkryetarëve do t’i hapte rrugë formimit të Qeverisë së re të Kosovës. LVV-së, si fituese të zgjedhjeve, i takon që e para të propozojë mandatarin për ekzekzutivin.
Nëse brenda 15 ditësh nuk e formon ekzekutivin, atëherë presidentja Vjosa Osmani, ka të drejtë të mandatojë cilëndo parti që ia garanton se i ka 61 votat për Qeverinë e re të Kosovës.
Nëse edhe mandatari i dytë dështon të formojë ekzekutivin, atëherë Osmani shpall mbajtjen e zgjedhjeve të reja.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
