Për 9 muaj 25 persona vdiqën në aksidente trafiku, policia me apel për qytetarët

Policia e Kosovës njofton se gjatë nëntë muajve të këtij viti, në Rajonin e Prishtinës kanë ndodhur 4,826 aksidente trafiku.


Sipas raportit policor, nga 4,826 aksidente, 24 prej tyre kanë qenë me pasoja fatale, ku kanë humbur jetën 25 persona.

Ndërsa 1,484 aksidente janë me të lënduar, ku janë lënduar 2,792 persona.

Po ashtu sipas policisë – 3,318 aksidente trafiku janë me dëme materiale.

Policia e Kosovës u ka bërë thirrje pjesëmarrësve në trafik që të respektojnë rregullat e kodit rrugor, në mënyrë që të ulet numri i ngjarjeve aksidentale dhe ulja e vdekshmërisë në komunikacion rrugor.

“Duke parë si shqetësues këtë numër të madh të aksidenteve të trafikut dhe veçanërisht numrin e madh të viktimave nga aksidentet fatale dhe të personave të lënduar, kërkojmë nga të gjithë pjesëmarrësit në trafik që të respektojnë me përpikëri të gjitha rregullat e kodit rrugor, në mënyrë që bashkërisht të ndikojmë në uljen e numrit të ngjarjeve aksidentale, uljen e vdekshmërisë në komunikacionin rrugor, e rrjedhimisht ngritjen e shkallës së sigurisë në trafik”, thuhet në apelin e Policisë së Kosovës. /Reporteri.net/.