Kuvendi i Kosovës sot organizon seancë të veçantë.

Me rastin e shënimit të 8 Marsit, Ditës Ndërkombëtare të Gruas, Kuvendi i Kosovës organizon seancë të veçantë, e cila do t’i kushtohet ngritjes së vetëdijes së shoqërisë për të mbijetuarat e dhunës seksuale gjatë luftës së fundit në Kosovë.

Deputetëve të Kuvendit të Republikës do t’iu drejtohet Vasfije Krasniqi-Goodman. Seanca mbahet në ora 11.00.

Vasfije Krasniqi është njëra nga femrat e rralla kosovare që ka folur për dhunën e përjetuar seksuale gjatë luftës në Kosovë.

Ajo si 16-vjeçare ishte marrë nën kërcënimin e armëve nga shtëpia e saj më 13 prill 1999 nga një burrë me uniformë të Policisë së Serbisë, transmeton Kosova Press.

Rreth 20 mijë gra i janë nënshtruar dhunës seksuale gjatë luftës së fundit.

Vasfije Krasniqi tani jeton në SHBA dhe është nënë e dy fëmijëve.