Kryetari i Prishtinës, Përparim Rama ka uruar qytetarët e Prishtinës për festën e Vitit të Ri.

Rama ka thënë se viti 2021 ka qenë vit sfidues dhe i vështirë për shkak të kushteve të krijuara nga pandemia.

“Ka qenë ky një tjetër vit sfidues dhe i vështirë për shkak të kushteve të krijuara nga pandemia. Përjetuam dhimbjen e humbjes së njerëzve tanë më të dashur. U dëmtuan ekonomitë familjare dhe u prek vetë mirëqenia e qytetarëve. Na u cunguan jeta kulturore dhe aktivitetet zbavitëse e sportive”, ka shkruar ai në një postim në Facebook.

Ai ka edhe një mesazh për qytetarët e kësaj komune.

“Mesazhi im për këtë natë të ndërrimit të moteve është mësimi që marr prej jush: veç me mirësi, guxim e punë shumë, do t’ia dalim, duke qenë të bashkuar e krah për njëri-tjetrin. Është ky mesazh i paqes dhe i dashurisë që uroj t’jua mbushë zemrat, sot e për çdo mot. Gëzofshim shëndet mbi të gjitha, e paçim gëzime e harmoni në familjet tona”, tha Rama.