Policia e Kosovës ka konfirmuar se pesë persona janë ndaluar në mbajtje për 48 orë, të dyshuar për plagosjet në Lupç të Podujevës ku 4 persona mbetën të plagosur e 1 prej tyre në gjendje më të rëndë, përcjell Reporteri.net.

Zëdhënësja e Policisë për rajonin e Prishtinës, Flora Ahmet tha se rasti është cilësuar si “vrasje në tentativë”.

“Deri tani, nga ana e prokurorit të shtetit, masë e ndalimit (48 orë) është shqiptuar për pesë persona të dyshuar dhe rasti është cilësuar si vrasje në tentativë”, tha Ahmeti.

Prokuroria: Plagosjet në Podujevë dyshohet se ndodhën pas mosmarrëveshjeve mes familjarëve

Në anën tjetër, zëdhënësja e Prokurorisë Themelore në Prishtinë, Laureta Ulaj, njoftoi se të njëjtit po trajtohen nën masa të policisë në QKUK.

“Prokurori i Shtetit ka lëshuar aktvendim mbi ndalimin e pesë (5) personave të dyshuar në këtë rast, për shkak të veprës penale “Vrasja në tentativë”. Personat e dyshuar të cilët janë duke u trajtuar në QKUK janë nën masën e sigurisë nga policia”, tha Ulaj.