Pjetër Shala akuzohet nga Haga për krime që pretendohet se janë kryer në Kukës të Shqipërisë

Ish-komandanti i Ushtrisë Çlirimtare të Kosovës, Pjetër Shala është transferuar sot për në Hagë pas konfirmimit të aktakuzës nga Dhomat e Specializuara të Gjykatës Speciale.


Shala i cili u arrestua më 16 mars të këtij viti në Belgjikë po akuzohet për krime që pretendohet se janë kryer në Kukës të Shqipërisë, shkruan Reporteri.net.

Gjykatësi i Procedurës Paraprake, Nikola Giju e konfirmoi aktakuzën kundër Shalës  më 12 qershor 2020.

Aktakuza e konfirmuar e redaktuar tashmë është bërë publike në pajtim me rregullën 88 të Rregullores së Procedurës dhe Provave. Për arsye sigurie, Gjykatësi i Procedurës Paraprake urdhëroi që aktakuza të bëhej publike me redaktime. Aktakuza mund të lexohet këtu.

Në aktakuzën e konfirmuar Shala ngarkohet me përgjegjësi penale individuale në forma të ndryshme për krime lufte si ndalim arbitrar, trajtim mizor, torturë dhe vrasje të paligjshme, të kryera në kontekstin e konfliktit të armatosur jondërkombëtar në Kosovë dhe në lidhje me këtë konflikt.

Krimet për të cilat akuzohet Shala pretendohet se u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës (Shqipëri), që pretendohet se përdorej prej Ushtrisë Çlirimtare të Kosovës.

Këto janë pikat e aktakuzës ndaj tij:
Pika 1: NDALIM ARBITRAR në fabrikën e metalit në Kukës, afërsisht midis 17 majit 1999 dhe 5 qershorit 1999, KRIM LUFTE, i ndëshkueshëm në bazë të neneve 14(1)(c) dhe 16(1)(a) të Ligjit;

Pika 2: TRAJTIM MIZOR në fabrikën e metalit në Kukës, afërsisht midis 17 majit 1999 dhe 5 qershorit 1999, KRIM LUFTE, i ndëshkueshëm në bazë të neneve 14(1)(c)(i) dhe 16(1)(a) të Ligjit;

Pika 3: TORTURË TORTURË në fabrikën e metalit në Kukës, afërsisht midis 17 majit 1999 dhe 5 qershorit 1999, KRIM LUFTE, i ndëshkueshëm në bazë të neneve 14(1)(c)(i) dhe 16(1)(a) të Ligjit; dhe

Pika 4: VRASJE E PALIGJSHME në fabrikën e metalit në Kukës më 5 qershor 1999, ose rreth kësaj date, KRIM LUFTE, i ndëshkueshëm në bazë të neneve 14(1)(c)(i) dhe 16(1)(a) të Ligjit.