Ish-deputetja e Lidhjes Demokratike të Kosovës, Rrezarta Krasniqi, po përflitet si një nga emrat potencialë për garën për kryetare të Komunës së Vushtrrisë në zgjedhjet lokale të 12 tetorit.

E kontaktuar nga gazeta online Reporteri.net, Krasniqi nuk ka mohuar mundësinë e kandidimit, por theksoi se ende nuk është marrë një vendim zyrtar nga strukturat e partisë në nivel lokal.

“Ende nuk është vendosur asgjë. Ne e kemi një kryesi të degës që merr vendimin, dhe pastaj ajo e dërgon propozimin në Kryesinë e LDK-së në nivel qendror. Jemi duke pritur se kur do të mbahet takimi,” tha ajo për Reporteri.net.

Pos Krasniqit, për të parin e komunës së Vushtrrisë, si kandidat i LDK-së përflitet edhe Xhafer Tahiri, i cili në zgjedhjet e fundit e humbi pushtetin pasi u mund nga Ferit Idrizi i PDK-së.

Një tjetër emër i përfolur brenda LDK-së është edhe Adnan Lahu./Reporteri.net/