Nismës së Vetëvendosjes për peticion me anë të së cilit kërkohen zgjedhje, gjatë ditës së djeshme është bashkangjitur edhe një polic kosovar, fotografia e të cilit qarkulloi në rrjetet sociale pasi u publikua nga një aktivist i VV-së.

Kjo ndodhi përkundër faktit që Policia e Kosovës sipas një vendimi ka ndaluar përfshirjen e pjesëtarëve të saj në tema, postime e ngjarje që kanë të bëjnë me politikë, madje si pasojë disa policë janë suspenduar nga detyra.

Lidhur me këtë Reporteri ka dërguar pyetje në adresë të Zyrës për Informim të Policisë së Kosovës, të cilët kanë thënë se rasti është duke u trajtuar.

“Policia e Kosovës posedon këtë informacion dhe të njëjtin është duke u trajtuar”, thuhet në përgjigjen e shkurtë të Zyrës për Informim të Policisë në adresë të Reporterit.

Kujtojmë se kohëve të fundit disa policë janë suspenduar nga puna për shkak të postimeve të tyre në rrjetet sociale. /Reporteri.net