Kryetari i Komunës së Prishtinës, Shpend Ahmeti, dhe asistenti i tij, Nezir Ismaili, janë kanosur gjatë ditës së djeshme.

Për rastin që dje u konfirmua nga Policia e Kosovës sot janë dhënë detaje të reja, shkruan Reporteri.net.

Siç bën të ditur policia përmes raportit 24 orësh, rasti ka ndodhur dje rreth orës 11:00.

Personi në fjalë dyshohet se një ditë më parë e kishte kanosur Ahmetin edhe përmes telefonit.

Prokuroria është njoftuar me këtë rast, dhe po vazhdon të hetohet.

Njoftimi i plotë:

Ankuesi mashkull K/Shqiptar, ka raportuar se një i dyshuar mashkull K/Shqiptar ka hyrë në objekt dhe duke e ofenduar verbalisht ka kërkuar takim me Kryetarin e Komunës. Dyshohet se një ditë më parë përmes mesazhit telefonik kishte kanosur të njëjtin. Në lidhje me rastin është njoftuar prokurori ndërsa rasti është duke u hetuar.