Presidenti Hashim Thaçi sërish potencoi se “dialogu duhet të vazhdojë pa kushtëzime dhe se tarifat duhet të mbeten në fuqi”.

Këto komente ai i bëri pas takimit me delegacionin gjermano-francez, me të cilët diskutoi për takimin në Paris, në mes të përfaqësuesve të shtetit të Kosovës dhe të shtetit të Serbisë.

Thaçi tha se mirëpret angazhimin dhe përpjekjet e presidentit Macron dhe kancelares Merkel për të ndihmuar rifillimin e procesit të dialogut nën udhëheqjen e Bashkimit Evropian

Ai gjithashtu kërkoi që qytetarët e Kosovës të mos mbahen të izoluar padrejtësisht dhe të mos trajtohen si qytetarë të dorës së dytë.

“Kosova nuk do të pranojë kritere tjera për liberalizimin e vizave, sidomos jo në formë të kërkesave për tarifat apo asociacionin”.

Në fund, presidenti Thaçi u shpreh se Kosova mbetet e përkushtuar për dialogun që duhet të përfundojë me marrëveshjen paqësore gjithëpërfshirëse, e cila do të sjellë njohjen reciproke mes Kosovës dhe Serbisë, si dhe anëtarësim të Kosovës në Kombet e Bashkuara.

Ndryshe, presidenti Thaçi në fillim kishte thënë se taksa duhet të largohet meqë këtë e kërkon Amerika dhe shtetet e BE-së, por më pas u pozicionua pro taksës, duke deklararuar se “nuk kishte thënë kurrë se është kundër”.