Presidenti i Republikës së Shqipërisë, Ilir Meta, po qëndron sot në Kosovë. Në një organizim të përbashkët me kryeministrin e Kosovës, Ramush Haradinajn, kreu i shtetit shqiptar ka ndarë medalje për të gjithë ushtarët e FSK-së të cilët i dolën në ndihmë zonave të prekura nga tërmeti shkatërrues i 26 nëntorit.

Meta gjatë ditës ka shkuar për ngushëllime edhe në familjen Abazi në Livoç të Gjilanit, dy djemtë e së cilës Isa dhe Shemsi Abazi ishin në mesin e viktimave të tërmetit shkatërrues në Shqipëri, shkruan Reporteri.net.

Në familjen Abazi, Meta ka qenë i shoqëruar edhe nga kryeministri në detyrë i Kosovës, Ramush Haradinaj dhe ambasadori i Kosovës në Shqipëri, Nait Hasani.

Kujtojmë se Isa dhe Shembsi Abazi ishin në mesin e  51 viktimave të tërmetit që goditi Shqipërinë mëngjesin e 26 nëntorit. Trupat e tyre u nxorën nga gërmadhat e hotelit ku ishin duke qëndruar, një ditë pas tërmetit.

Kujtojmë se Qeveria shqiptare javën e kaluar ka 16 mijë euro për ta ndihmuar familjen Abazi. /Reporteri.net