Në momentin kur Zyra e Prokurorit Special bëri të ditur se ndaj presidentit Hashim Thaçi është ngritur aktakuzë, i pari i vendit ishte në ajër.

Presidenti ishte nisur për në Washington që para disa orësh dhe po vazhdon të udhëtojë, shkruan Reporteri.net.

Këtë gjë e ka konfirmuar gazetari i The Guardian për Evropën, Shaun Walker.

“Thaçi është aktualisht në fluturim për në ShBA, për takimin e së shtunes në Shtëpinë e Bardhë. Ai ndodhej rrugës kur doli njoftimi për akuzat për krime lufte ndaj njerëzimit. Kështu më kanë thënë”, ka thënë gazetari.

Sidoqoftë, askush nga zyra e Thaçit ende nuk është deklaruar për këtë çështje, pasi edhe ata ndodhen në udhëtim për në Amerikë.

Reporteri.net shkruajti më herët se aktakuza ndaj presidentit Thaçi dhe kryetarit të PDK-së, Kadri Veselit, ishte dorëzuar më 24 prill por u bë publik dy muaj më vonë.

Ndryshe, Thaçi dhe Veseli po akuzohen se janë përgjegjë për vrasjen e rreth 100 personave serbë, shqiptarë dhe romë, duke përfshirë edhe vrasjet politike./Reporteri.net