Presidenti i Kosovës Hashim Thaçi sot në 30-vjetorin e Kushtetutës së Kaçanikut ka vlerësuar këtë ngjarje si akt të guximshëm të delegatëve shqiptarë.

Sipas Thaçit, këto veprime kanë dëshmuar vendosmëri, vetëdije të lartë kombëtare e shtetformuese.

“Vullneti i popullit tonë për liri dhe pavarësi ishte shekullor. I tillë ishte edhe vullneti i përfaqësuesve politikë. Ngjarjet e 2 korrikut dhe 7 shtatorit të vitit 1990 ishin akte të guximshme të delegatëve shqiptarë, që dëshmuan vendosmëri dhe vetëdije të lartë kombëtare e shtetformuese”, shkruan presidenti në postimin e tij në “Facebook”.

“Sot, me respekt të veçantë, kujtojmë sakrificën dhe përkushtimin e deputetëve të atëhershëm të Kuvendit të Kosovës, që në rrethana të jashtëzakonshme miratuan Kushtetutën e Kaçanikut, e cila ishte bazament i fuqishëm për ndërtimin e jetës demokratike dhe institucionale në Kosovë. Liria dhe pavarësia ishin ëndërr e shumë brezave, që sakrifikuan gjithçka për t’i bërë realitet”.