Presidentja e vendit, Vjosa Osmani, ka dalur me një reagim lidhur me incidentin në Shtërpcë, ku mbetën të plagosur dy të rinj serbë.
Presidentja Osmani e quajti akt të patolerueshëm plagosjen në Shtërpcë dhe kërkoi që autori i sulmit të përballet me drejtësinë, transmeton Gazeta Online Reporteri.net.
“Plagosja e të rinjve 11 dhe 21 vjeçar në Shtërpcë është akt i patolerueshëm, ndaj autori duhet të vihet para drejtësisë”, thuhet në reagimin e Osmanit.
Ajo ka kërkuar nga organet e sigurisë që të mirren urgjentisht me rastin.
“Institucionet e Kosovës janë të përkushtuara maksimalisht që qytetarëve pa dallim etnie t’u ofrohet ambient i sigurt dhe i qetë. Të plagosurve ju dëshiroj shërim të shpejtë, ndërkaq ftoj organet e sigurisë që rastin ta trajtojne urgjentisht e sipas ligjit.”
Ndaj këtij incidenti ka reaguar edhe kryeministri i Kosovës, Albin Kurti.
Përmes një reagimi, Kurti tha se është tejet i brengosur për plagosjen e tyre dhe se autori i sulmit do të përballet me drejtësinë.
“E dënoj ashpër sulmin ndaj dy qytetarëve të Kosovës në Shtërpcë. Thellësisht i brengosur për plagosjen e tyre. Sipas informatave, të rinjtë 11 dhe 21 vjeçar janë jashtë rrezikut për jetë dhe ju dëshiroj shërim të shpejtë. Policia e Kosovës veçse ka arrestuar të dyshuarin i cili pa asnjë mëdyshje duhet dhe do të përballet me organet e drejtësisë”, shkroi Kurti në Facebook.
Ai tha se njësitet do t’i vazhdojnë hetimet në lidhje me rastin, që Kurti e quajti të papranueshëm. /Reporteri.net/.