Prokuroria Themelore në Mitrovicë ka urdhëruar që të bëhet rinumërimi i votave të Lidhjes Demokratike të Kosovës në të gjitha qendrat e vendvotimeve në komunën e Vushtrrisë.

Kjo është konfirmuar për Gazetën Online Reporteri.net nga zëdhënësi i kësaj prokurorie, Valon Preteni.

“Konfirmoj që do të bëhet rinumërimi, dhe varësisht nga rezultatet do të veprohet”, tha Preteni për Reporteri.net.

Kjo erdhi pas një ankese të bërë nga kandidatja për deputete e LDK-së, Rrezarta Krasniqi në drejtim të bashkëpartiakut të saj, Xhafer Tahiri.

Sipas Rrezarta Krasniqit, në shkollën “Ali Kelmendi” në Vushtrri, LDK kishte pasur gjithsej 55 vota, dhe kandidati për kryeministër, Lumir Abdixhiku aty ka marrë 52 vota, ndërsa Xhafer Tahiri 54 vota.

Gjithashtu, në arsyetimin e saj, kandidatja e LDK-së thotë që dyshim për manipulim të votave ka pasur edhe në vendvotime tjera.

Në vendimin e Prokurorisë, të publikuar nga Telegrafi, thuhet se ekziston dyshimi se ka pasur manipulim të vota për ta ndihmuar kandidatin Xhafer Tahiri.

“Vendi i rinumërimit të votave do të bëhet në objektin e QNR-së në Prishtinë”, thuhet në vendimin e Prokurorisë.

/Reporteri.net/