Në një kafiteri në kryeqytet janë takuar sot nënkryetari i LDK-së Lutfi Haziri me sekretarin e PSD-së, Dardan Molliqaj.

Gazeta Express ka marrë një përgjigje nga PSD-ja se për çka u organizua ky takim. Sipas PSD-së takimi ishte rastësi dhe aty është diskutuar situata e përgjithshme politike dhe jo ndonjë koalicion i mundshëm parazgjedhor.

Nënkryetari i LDK-së Lutfi Hazriri, parti kjo që vazhdimisht e quan PSD-në “patericë të PDK-së”, sot është takuar me njërin prej njerëzve kryesor të partisë së Shpend Ahmetit, Dardan Molliqaj.

Nga PSD-ja që po mundohen ta çojnë në opozitë PDK-në e Kadri Veselit, thonë se në takimin Haziri-Molliqaj, nuk u diskuta mundësia për koalicion parazgjedhor.

“Pas thirrjeve të shumta në lidhje me takimin në mes të z.Molliqaj dhe z.Haziri, ju njoftoj që takimi ka qenë i rastësishëm dhe është diskutuar situata e përgjithshme politike dhe jo ndonjë koalicion i mundshëm parazgjedhor”, tha për Gazetën zëdhënësja e PSD-së, Natyra Kuçi.

Gazeta ka tentuar të marrë një prononcim edhe nga Lutfi Haziri, por ky i fundit ka ndalur telefonin.

Pas dorëheqjes së Ramush Haradinajt nga posti i kryeministrit janë shtyar takimet ndërmjet partive politike.