Njohësi i zhvillimeve politike në vend, Visar Ymeri ka komentuar mesazhet e publikuara nga gazeta online Reporteri.net ndërmjet anëtarëve të Kryesisë së Lidhjes Demokratike të Kosovës, ku insistohej nga disa prej anëtarëve të Kryesisë për orkestrimin e një “skeme të organizuar kriminale” brenda partisë që drejtohet nga Lumir Abdixhiku.

Ai ka komentuar edhe reagimin e kryetarit të LDK-së, Lumir Abdixhiku, pas publikimit të komunikimeve, të cilin e quajti si shantazh dhe sulme të sinkronizuara.

“Po shihet që këto mospajtimet e brendshme që kanë dalë pas zgjedhjeve dhe këto që u publikuan në Reporteri, tregojnë që ka një problem i cili duhet trajtuar sepse i ke disa prej emrave më eminent të LDK-së që po shprehin shqetësime.  Diskutimet që i kemi lexuar, akuzojnë qarqe të caktuara kushdo qofshin ata brenda LDK-së. Akuzat e tyre janë të brendshme në kuptimin që ka pasur sipas tyre, manipulim, orientim të votës nga një kandidat te një kandidat tjetër brenda LDK-së. Nuk është manipulim i votave mes partive.”, tha ai.

Ai tha se e kupton qëndrimin e kryetarit të LDK-së dhe pozicionin e vështirë, sepse edhe vetë ishte gjendur në një situatë të përafërt kur e drejtonte LVV-në.

“Problem që vështirë menaxhohet. Kur thua shantazh e kuptoj si pozicion politk, nuk mendoj se është ashtu. Por, duhet pasur parasysh se kur flet në publik je duke e dhënë një far shenje se si po e trajton problemin. Nëse thua se është shantazh për tu dorëzuar LDK-ja, kjo i bie që problem nuk ekziston por është i stisur, Me gjasë problemi ekziston dhe duhet të trajtohet. Por nëse po shantazhohet nga brenda LDK-ja për t’u dorëzuar mendoj se kjo e ngrit edhe një problem më të madh. Pra si i paska LDK-ja anëtarët e saj eminent që po e shantazhojkan për dorëzim. Tjetër gjë është të thuash se më janë vjedhur votat dhe duhet të adresohet ky problem, ajo është legjitime. Por, nëse ti si anëtarë i LDK-së po e shantazhon LDK-në, atëherë ti nuk qenke anëtarë i LDK-së. Fjalët veçanërisht kur vijnë nga një pozitë e lartë partiake apo institucional kanë peshë dhe duhet të thuhen me kujdes.”, tha Ymeri.

Ymeri po ashtu tha se edhe tentimi keqpërdorimit që ia bëri Lëvizja Vetëvendosje, këtij diskutimi duhet dënuar.

Publikimi i këtij debati të brendshëm në grupin e Kryesisë qendrore në “Viber” ka reagimin e vetë kreut të LDK-së, Lumir Abdixhiku.

Në Facebook, ai i quajti sulme të sinkronizuaran ndaj LDK-së “të nisura që nga përfundimi i zgjedhjeve” dhe sipas tij “nuk janë as të rastësishme e as të paqëllimshme”. “Ato rikulmuan dhe sonte, në sinkron!”, shtoi Abdixhiku.

“Janë sulme që për target pështyme kanë, merreni me mend, partinë e vendit të tretë. Ne, sërish, për të satën herë nga vendi i tretë – siç na kujtojnë këta si të parëndësishëm – jemi fajtorët kryesorë për secilën gjë në këtë vend. Në këto sulme të paramenduara e në sinkron, janë bërë bashkë kundërshtarët e rinj e të vjetër të Lidhjes; dhe gjithë ata që ndjejnë se kanë humbur hapin me hapjen e madhe që në LDK ka ndodhë, po ndodhë dhe do të ndodhë”.

Mesazhet, e siguruara nga Reporteri, tregojnë një bisedë mes ish-shefit të grupit parlamentar të LDK-së, Arben Gashi, dhe Kujtim Shalës, ku përmendet vjedhja e votave të diasporës.

Gashi e cilëson këtë rast si një “skemë kriminale” dhe kërkon që të trajtohet si e tillë.

“Faktet po ulërasin o Kujtim. Ti duhet me u pajtu me shqetësimin, për krimin që ka ndodhë,” shkruan Gashi në mesazhet e publikuara.

Në përgjigje, Kujtim Shala thekson se “asnjë manipulim nuk është i tolerueshëm”.

Gashi insiston: “Kujt, qitja emrin, nuk është manipulim, është skemë e organizuar kriminale. Pa e identifikuar saktë problemin, nuk mundemi me e shpëtu partinë.”

Publikimi i këtyre mesazheve ka ngritur debate brenda partisë, duke shtuar shqetësimet për procesin zgjedhor dhe integritetin e tij.

Ndryshe, “skemë kriminale”, gjendjen me votat me postë brenda listës zgjedhore të LDK-së e kishte emërtuar edhe anëtari tjetër i kryesisë Shkëmb Manaj. Një mesazh të tij që akuzonte partinë për vjedhje të votave, të cilin Manaj e kishte dërguar në një nga grupet e brendshëm të komunikimit të Kryesisë së partisë, e ka nxjerrë në publik gazeta online Reporteri.net, të premten e javës që shkoi.
“Nuk lejoj kurrë që mandatin të cilin ma kanë dhënë qytetarët, të më vjedhjet nga ata qe me skema të shitblerjes se votave dhe të mbushjes industriale të tyre në postat e vendeve evropiane nga grupe dhe individë që me logjikën e tyre të veprimit nuk kanë të bëjnë asgjë me LDK-në” – thuhej nder tjera në mesazhin e Manajt.

Disa javë pas këtyre akuzave, të premten e 28 marsit, Shkëmb Manaj u rehatua me pozitën e nënkryetarit të Komunës së Prishtinës, komunë e cila qeveriset nga Përparim Rama i LDK-së. Njoftimin e dha vetë i pari i partisë, Lumir Abdixhiku.

“Shihet prej aeroplanit kjo skemë… nuk është LDK që unë njoh” – mesazhet në “Viber” të Hazirit, Halitit, Dushit e Kajtazit për dyshimet në votat e diasporës