Qeveria e Kosovës ka vendosur që të ketë koordinator nacional për zbatimin e Strategjisë për parandalimin e ekstremizmit të dhunshëm dhe luftimin e terrorizmit.

“Në mënyrë që të implementojmë aktivitetet dhe obligimet është e nevojshme që të caktohet koordinatori nacional”, ka thënë ministri i Punëve të Brendshme, Agim Veliu.

Zv.kryeministri Besnik Tahiri ka arsyetuar nevojën e të pasurit koordinator.

Disa të tillë, që njiheshin si nacionalë, ishin emëruar në Qeverinë Haradinaj për çështje të caktuara, por me ardhjen e Qeverisë Kurti ata ishin pushuar dhe vendet e tyre të punës ishin shuar. Javën e kaluar, kryeministri Avdullah Hoti vendosi të emërojë koordinator për dialogun me Serbinë, gjë që u kritikua nga shoqëria civile.

Tash në Qeverinë Hoti, sërish ka koordinatorë.

“Mendoj që duhet të theksohet një çështje. Nuk jemi duke folur më për koordinatorë nacionalë që kanë qenë në qeverinë e kaluar. Nuk po flasim për një strukturë paralele, por për një strukturë shumë të nevojshme”, ka thënë Tahiri.