Qeveria e Kosovës ka vendosur që ta pezullojë punën e Agjencisë Kosovare të Privatizimit, me arsyetimin se në program qeverisës pritet t’i ndryshohen politikat.

Sipas këtij vendimi që u mor mbrëmë në mbledhjen korreponduese të Qeverisë, u pezulluan edhe proceset me pronat e paluajtshme që janë nën administrim të kësaj agjencie, shkruan Reporteri.net.

“Është miratuar edhe vendimi në të cilin i kërkohet Agjencisë Kosovare të Privatizimit të pezullojë për afat të pacaktuar të gjitha veprimet në lidhje me pronat e paluajtshme që ka nën administrim. Në arsyetimin e këtij vendimi thuhet se Programi i Qeverisë 2020-2023 parasheh politika që mund të ndryshojnë statusin aktual të Agjencisë Kosovare të Privatizimit dhe të ndryshojnë administrimin afatgjatë të pronës publike dhe shoqërore”, thuhet në njoftimin e Qeverisë.

Ndërkohë, ministrat e Kurtit vendosën edhe që të anulohet zona ekonomike në Malishevë, e cila u bë gjatë Qeverisë së kaluar.

Me këtë rast, janë pezulluar edhe shpronësimet që kanë nisur në këtë zonë pas krijimit të zonës ekonomike./Reporteri.net