Dështojnë zgjedhjet në Tërnoc, Kamberi fajëson komisionerët e partisë së Daçiqit

Për herën e katërt në njësinë numër 6 në Tërnoc të Luginës së Preshevës, këtë të enjte është organizuar procesi i votimit për zgjedhjet parlamentare të Serbisë. Por, qytetarët nuk kanë mundur të votojnë fare.

Kandidati për deputet në Parlamentin e Serbisë, Shaip Kamberi, ka fajësuar komisionerët e partisë së Ivica Daçiq për pengesa.

“Zgjedhjet nuk filluan fare sot në Tërnoc. Komisionerët e Ivica Daçiqit deshën ta bëjnë ligjin sot në Tërnoc, duke thënë se kjo është ‘kralevinë’. Nuk i lejuam e as që do t’i lejojmë”, ka shkruar Kamberi në Facebook.

Këto zgjedhje ishin shansi i fundit që Kamberi të zë ulëse si deputet në Kuvendin e Serbisë.

Gjatë ditës, në Tërnoc pati edhe informacione për bombë por të njëjtat dolën të rreme.

Zgjedhjet në Tërnoc janë paraparë të mbahen sot për herë të katërt, pasi Gjykata Administrative vendosi në favor të ankesës së Koalicionit të Shqiptarëve të Luginës, në krye me Shaip Kamberin.

Në herën e fundit kur janë mbajtur zgjedhjet parlamentare në Serbi, Shaip Kamberi nuk kishte arritur të sigurojë ulëse për 12 vota.

Kandidatit për deputet, Shaip Kamberi, i duhen gjithsej 610 vota.

Koalicioni i Shqiptarëve të Luginës, që përbëhet nga Partia për Veprim Demokratik bashkë me Partinë Demokratike dhe Lëvizjen e Progresit Demokratik mori 9,644 vota të cilat nuk ia dhanë një mandat shqiptarëve në Kuvendin e Serbisë.