×
  • Lajme
  • Rajon / Flasin nga zyra e tij

    Gazeta malazeze: Gjukanoviq u informua nga Kosova se po përgatitet atentat ndaj tij

    Reporteri
    13 Korrik 2024 | 14:36

    Gazeta malazeze “Vijesti” ka raportuar sot se ish-presidenti i këtij vendi, Millo Gjukanoviq, ka qenë cak i një tentim-vrasjeje të planifikuar dhe se për këtë i ka njoftuar edhe autoritetet e vendit.

    Policia malaziase të premten vonë ka thënë se nuk ka të dhëna që tregojnë se po rrezikohet siguria e Gjukanoviqit. Agjencia e Sigurisë Kombëtare nuk ka dhënë koment.

    “Ish-presidenti i ka marrë informacionet e lartpërmendura nga disa zyrtarë ndërkombëtarë nga komuniteti i inteligjencës dhe me atë informacion ka njoftuar autoritetet shtetërore”, thuhet në përgjigjen e zyrës së Gjukanoviqit për “Vijesti”.

    Zyra nuk ka treguar se kush dhe kur i janë dhënë këto informacione Gjukanoviqit.

    Sipas burimeve, zyrtari i lartë ushtarak nga Kosova e ka informuar ish-presidentin malazias se një grup i organizuar kriminal nga një vend fqinj dyshohet se po planifikonte të kryente atentatin, në bashkëpunim me shërbimet e sigurisë së një vendi tjetër fqinj.

    “Sipas nenit 18 të Ligjit për Presidentin e Malit të Zi, me përfundimin e detyrës, presidenti ka të drejtë për sigurim të përhershëm personal në përputhje me vlerësimin e sigurisë të përcaktuar nga organi kompetent, në pajtim me ligjin. Agjencia e Sigurisë Kombëtare është përgjegjëse për përgatitjen e raporteve për vlerësimin e kërcënimeve të sigurisë”, ka thënë Policia.

    Duke iu përgjigjur pyetjes se a është rritur siguria e Gjukanoviqit, zyra e tij ka njoftuar se ajo është reduktuar.

    “Ndryshimet e sigurisë kanë ndodhur deri në atë masë sa që siguria në vendbanimin e ish-presidentit është hequr gjatë ndërrimit të ditës”, thuhet në përgjigje.

    Sipas zyrës së Gjukanoviqit, ish-presidenti nuk është ftuar për intervistim nga shërbimet malaziase të sigurisë.

    62-vjeçari ishte president i Malit të Zi nga 2018-ta deri më 2023. Njihet për qëndrimet pro-Kosovës.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2025. Të gjitha të drejtat e rezervuara.

    Linku i lajmit u kopjua!