Javën e kaluar, Serbia ka përuruar zyrën e saj të inovacionit dhe tregtisë në Jerusalem.

Kjo lëvizje vjen pas disa muajsh të zemërimit të Serbisë, pasi Izraeli u përfshi në përpjekjen e SHBA-së për të ndërmjetësuar në çështjen e pazgjidhur mes Kosovës dhe Serbisë dhe e njohu Kosovën.

Kjo bëri që Beogradi me sa duket të refuzojë premtimin e saj të mëparshëm për të zhvendosur ambasadën në Jerusalem dhe zyrtarët izraelitë tani shpresojnë se fillimi i një marrëdhënieje më të mirë biznesi mund të japë gjithashtu fryte diplomatike.

Zyra, e vendosur në Margalit Startup City Jerusalem, është krijuar për t’u mundësuar vendeve të përmbushin potencialin e tyre ekonomik dypalësh, ka thënë Tatjana Matic, ministrja e tregtisë, turizmit dhe telekomunikacionit e Serbisë, për The Times of Israel, përcjell Gazeta Online Reporteri.net.

“Ne kemi marrëdhënie shumë të mira dypalëshe me Izraelin dhe mendojmë se duhet të përmirësojmë bashkëpunimin tonë ekonomik. Duhet të shkojmë shumë më tej. Ne kemi nevojë për më shumë investime dhe është shumë e rëndësishme të kemi zyrën këtu,” tha ajo, duke shtuar se sheh gjithashtu hapësirë për rritje në fushën e turizmit, sigurisë kibernetike dhe teknologjisë.

“Niveli i marrëdhënieve tona ekonomike dypalëshe nuk është aq i kënaqshëm. Ne duhet dhe mund të bëjmë shumë më tepër”, tha ajo.

Zyra, e cila filloi funksionimin në gusht, por vonoi hapjen e saj për shkak të kufizimeve të COVID-19, do të kërkojë të tërheqë investime izraelite “në pasuri të paluajtshme, energji të rinovueshme, menaxhimin e ujit, mjedisin, infrastrukturën dhe transportin, me rritjen e eksporteve serbe në Izrael ”, ka thënë Aleksandar Nikoliq, drejtor i zyrës dhe konsull nderi i Serbisë në Izrael.

“Të gjitha vendet e respektuara dhe të zhvilluara të orientuara drejt inovacionit dhe teknologjisë së lartë kanë zyrat e tyre përfaqësuese në Izrael,” tha Nikoliq.

“Serbia e njohu Izraelin si një partner natyror për këtë çështje. Serbia iu bashkua më të mirëve të klubit për të bërë biznes me Izraelin”, ka shtuar ai.

Tregtia midis vendeve është rreth 73 milionë euro në vit, me eksportet serbe në Izrael në rritje dhe eksportet izraelite në Serbi në rënie gjatë pesëmbëdhjetë viteve të fundit. /Reporteri.net/